有冇人同我一樣，好憎見工係group interview？
上星期見咗份工，個HR同Manager叫晒4個求職者入房interview，包括我，唔算大嘅會議室裡面有6個人，連呼吸都覺得有啲侷促。
戲肉係搶答題，佢哋都係想測試班求職者邊個積極啲，邊個答得好啲啫，要正面大激鬥吖嘛，fine！不過第一個問題已經畀佢kick住，個Manager問大家：「你哋諗清楚，今日嚟見呢份工究竟係looking for出糧，定係looking for自己嘅事業長遠發展？」
乜嘢呀？其實我唔識你㗎！搵工唔講金唔通講心？何況你呢份工萬零蚊咋，就算諗長遠發展都唔係而家諗啦！
當我仲諗緊點解個問題咁奇怪嘅時候，其中一位競爭對手衝出嚟答：「我 looking for 事業嘅長遠發展！」
嘩！咁假你都答得出，得啦！你贏！
然後個HR同Manager基本上全程望住呢位求職者講嘢同問嘢，我同另外幾位求職者就好似佈景板陪坐。
Manager：「其他人咁靜嘅？得一個人可以同我交流咋？活躍啲，主動啲吖！每個人講下自己有啲咩係堅持連續做咗5年。」
我好想答佢：堅持連續做5年？打飛機囉！咁當然我冇咁答，都係講啲行貨嘢就算。
由嗰位仁兄答：「我係looking for 事業嘅長遠發展！」之後，其實個interview已經完咗㗎喇，最後個Manager同HR叫晒我哋另外幾位求職者走，淨係留嗰位仁兄，抵佢贏到份工嘅！
後來我喺度諗，如果interview係正常1 vs 1，我會唔會答looking for 事業長遠發展呢？對方咁問，你都知佢想聽咩答案，只係要一次過喺咁多人面前做戲，我覺得好尷尬啫！