平時大家收到啲來歷不明，又煩又乞人憎嘅cold call銷售電話，一般會點樣處理？Cut線？開口就鬧？玩柒對方？我自己為咗冇手尾跟（驚對方之後打嚟玩嘢），通常會禮貌講句：「唔需要喇唔該！」但我同事竟然次次都同人傾粒幾鐘。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
最初以為佢同friend傾電話，直至有一次愈聽愈唔對路：「廣州有咩玩㗎？我唔上啦，都冇回鄉卡……你嚟香港搵我？真定假呀？你幾高先？我169喎，好驚同矮過我嘅男仔出街，人哋望落去會覺得我好大隻，唔知點解聽聲覺得你係瘦仔。」
我第一個感覺就係同事玩緊網戀，你知年中都好多人中招㗎嘛，聽住佢傾咗成粒鐘，但係連對方高矮肥瘦都唔知，一時又話去廣州，一時又話嚟香港，好高危喎！
同事傾到臨放工先收線，我用咗比較婉轉嘅方式去關心佢：「點呀？好sweet喎，咁個男仔究竟幾高啫？」
Rita：「你都聽到呀？佢冇講呀？咁即係矮過我啦！」
我：「邊度識㗎？交友App呀？乜呢啲App唔係有相㗎咩？你好似連佢咩樣都唔知嘅？」
Rita：「梗係唔係啦，我都唔玩交友App，條友打嚟sell我買碧桂園，原來佢喺廣州返工，見悶悶地咪同佢吹兩嘴囉，嗱！咁又5:45喇，執埋嘢就夠鐘收工！」
我：「Sell碧桂園？咁你問人幾高？」
Rita：「頭先好眼瞓呀，好在有條友陪我傾計咋！條廣州仔仲話嚟香港搵我食飯，我見差唔多夠鐘，傾夠，咪cut佢線囉！」
會唔會癲咗啲呀？
後來我發現Rita係慣性同打嚟cold call嘅人吹水，佢話咁樣打發時間好快就放工，講真我每日都收到呢啲電話，Rita亦一樣，佢每日都會同對方吹水，人哋sell美容又吹，sell借錢又吹，連KK園打嚟嘅電話佢都照傾。
Rita：「KK園嗰個最慘，真係冇錢，唔知佢而家點呢？上次有個香港打嚟sell借錢，我chok埋佢幾錢一個月，原來月薪得9,000，另外有佣，佢話自己試過最叻嗰個月搵二萬幾，因為有幾個客都需要借錢，最後又做得成。」
我：「你連呢啲cold call行情都check埋？佢又肯答你嘅？」
Rita：「嗰條女嚟嘅，幾好傾喎！我問佢點解要做呢啲工，又唔係好好pay，求其搵份Sales都唔止9,000啦，有人借錢就話月入萬幾二萬啫，冇就真係齋食底薪，同埋佢多多少少都有呃人同誤導成份，傷天害理就唔好啦！」
我：「你社工都做埋呀？」
Rita：「有個傾到喊呀！佢話好多卡數，所以明知係呃人都做喎，仲話自己最仆街試過呃阿婆。」
我：「呢啲仆街你仲同佢傾？點呃呀？呃咗幾多呀？」
Rita：「啱啱講到入戲肉就斷咗線，應該係畀supervisor發現監生cut佢個call，好過癮㗎佢哋，背後有好多故事，但唔係個個肯講你聽，始終啲電話有錄音，佢哋又話有supervisor聽你講call，有人嫌我煩cut返我線添！」
Rita仲話，呢啲做cold call嘅人，打100個電話出去，起碼有90個以上都係被cut線甚至粗口問候，好難得會有人同佢哋吹水。
不過Rita係大膽到連video call都照傾，你哋知唔知啲詐騙電話發展到會搵AI扮真人去video call？早排我見Rita接咗，就咁開住放喺枱頭，一路做嘢一路戴airpod同人吹水，對方個畫面係一個類似混血兒嘅型男，估唔到Rita可以一路video call一路同我講嘢：「假㗎！AI樣，佢話自己變劉德華都得㗎！叫佢show真樣畀我睇又唔肯！」
痴線！😂😂兜口兜面拆穿人，不過對面聽到又好似冇乜所謂。
雖然話打發時間啫，但係Rita成日同呢啲古靈精怪人傾個幾兩個鐘，我真係覺得好攰囉！想時間易過啲其實仲有好多方法啫，唔使日日同陌生人傾咁耐呀？（完）
情迷下屬親大佬女上司隨時變阿嫂｜細佬唔睇好搵定工跳槽平時明明好憎男人原來鍾意大隻仔 #職場 #OfficeDaily #辦公室日報
https://youtu.be/nWfN74b93a0