「Expected salary填$25,000？點解呀？」約咗個求職者上嚟interview，未嚟得切叫佢自我介紹，我已經質疑咗佢嘅叫價先，冇辦法，因為張application form嘅次序係由expected salary開始順住落，所以拎起手第一眼就睇到。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
求職者：「太多？其實我$23,000都ok㗎！」
我拎住張application form再睇落去，$23,000其實係佢上一份工嘅last salary，換言之佢就算平手都ok，似乎對自己太冇信心。
不過講咩都冇用，最緊要佢能力同表現冇問題先，所以我暫時skip咗人工呢part，專心做晒成個interview再講，然後我又發現佢答嘢有紋有路，之前嘅job duties直頭同我嘅要求一模一樣，仲可以話係有多冇少，而且我鍾意佢態度好humble。
我：「你等我一陣。」我行咗出房問HR拎多張application form，然後返入去嗌佢再填多次，最重要係想佢改一改個expected salary，費事佢用原子筆修改或者用改錯帶覆蓋，雖然被抽秤機會唔大，不過謹慎啲好。
我遞張新form畀呢位求職者嘅時候再補充：「expected salary你填……3萬啦！」
佢碌大對眼望住我：「咁多？」
最終佢都係聽我講填咗3萬，而最終我亦真係請咗佢。
其實第一個問點解嘅人係公司HR，我嘅回答好簡單：「呢個position老細畀嘅budget係$30,000至$35,000，我哋一早有共識，個求職者填expected salary係$25,000，連budget嘅下限都未到。」
HR：「咁但係我揀呢份CV出嚟，就係因為見佢match到你嘅requirements，而expected salary仲要平咗好多。」
我同HR講：「咁我想問下你喇，佢嗌$25,000，公司呢個位嘅budget最低都$30,000，慳咗呢$5,000老細係咪會加落你份糧吖？」
HR笑一笑冇出聲，我亦好識做咁講個爛gag打圓場：「做咩？下限都唔畀人，即係睇唔起我哋老細啫！」
HR：「得啦！你話點就點啦！係咪出offer㗎喇？使唔使我幫你打畀佢confirm？我出定份contract啦！」
由於我請咗呢個人，以下我就改一改個稱呼，唔再叫求職者，叫返佢個英文名Daniel啦！
入職後大約一星期，我帶咗Daniel出去見兩個客，因為兩個client visit分別係11:30同埋2:30，所以中間就同佢去飲茶，今次輪到Daniel問返我點解要佢改expected salary做3萬。
我都係答嗰句：「因為老細畀呢個position嘅budget有3萬囉！就係咁簡單！」
Daniel：「其實我$25,000都ok㗎，所以你叫我再填form嗰陣，我擔心過填3萬會唔會太狼？驚會因為咁而唔請。」
我：「你知唔知你上一份工嘅last salary同而家市價有少少距離？我見過另一位求職者，佢經驗少過你，interview表現唔夠你好，但叫價都高過你，而且佢last salary已經高過你㗎喇！」
Daniel：「我都知自己上一份工係低人工，所以先決定轉工之嘛！」
我當時內心對白係，屌！啲錢係公司嘅，老細又唔係差嗰幾千蚊開飯，但你人工差幾千就差好遠喇，唔係話Daniel差幾千蚊會冇飯開，而係Daniel份糧一直低於市價，第日再轉工咪差好遠囉，幾時先追到出面呀？
對住新人，我會答得比較穩健：「得㗎喇，相信自己嘅能力，相信自己值呢個價，你畀心機做就ok！」
Daniel：「多謝，畀我請你飲茶吖！呢餐我請！」
我：「唔使你請，如果我哋出去見客食飯，其實都有得claim㗎，雖然呢餐茶冇客跟埋嚟，總之你之後有機會出去見客，就算淨係飲杯啡都記得拎單，你可以同公司claim！」
啲錢係公司嘅，使乜同老細慳呀？
我唔係偉大，其實我係自私先啱，慷公司之慨，令到個下屬做得開心，對我百利而無一害，試想像呢個人本身逗開$23,000，嗌$25,000已經滿足，最後offer畀佢3萬，換轉係你開唔開心？會唔會珍惜呢份工同呢個機會？
請一個人再train一個人，其實好攰㗎！希望Daniel做得長啦！而家我老細冇錢咩？與其幫老細慳幾千，不如請隻fit馬返嚟幫公司賺多啲錢咪仲實際！（完）
唔係個個求職者都咁好彩㗎！
見工句句腌臢 最終壓價四千
https://hkofficedaily.com/?p=21688