新同事返工第三日，做到6:25pm仲埋頭苦幹，搞到我要開聲同佢講：「走喇走喇，夠鐘走喇。」
「但我想做埋少少先喎。」
「走啦，老闆鬧㗎！」
說時遲那時快，老闆已經拎晒公事包行出嚟對住我哋講：「收工收工，熄機熄燈熄冷氣。」
新同事一臉茫然，呢個表情好熟悉，因為兩年前入職嗰陣，同一個場面，同一堆對白，同樣發生喺我身上。
當年我入職第一日已經準備OT，並唔係新嚟想搏表現，而係初初嚟到好多嘢想整理，document, file, 仲有實用網頁想bookmark再分類，又想執得張枱有條理啲，加上前一份工慣咗OT，6點幾走實會畀manager黑面，搞到成個人潛意識冇諗過準時收工呢樣嘢，或者呢啲就係香港人成日講嘅奴性，奴隸式嘅工作，係會變成慣性。
初初入嚟呢間公司做嗰陣，有個同事話我知：「呢度唔畀OT㗎！」嗰陣我以為玩新人，公司只會唔鍾意你準時走，點會唔鍾意員工OT呢？
新入職唔敢問，後來發現包括老闆在內，全部人真係唔會超過6:30pm走，Office hour以外更加唔會有任何公事WhatsApp，如果放假或者夜晚覆email，老闆直頭會鬧人，所以我覺得好奇怪。
做熟咗，有次同老闆出去見一個supplier，我原意唔係想八卦，純粹想趁呢個機會讚老闆好好，竟然唔畀同事OT，放假又唔畀覆email，點知佢講咗個故事我聽。
老闆：「我太太喺2014年走咗，子宮頸癌，佢病嗰陣我雖然有陪佢，不過當時公司叫做啱啱上軌道，好多時仲要抽身工作，再加埋創業頭幾年好搏，我幾乎係冇娛樂，太太好體諒，兩公婆有時去附近商場食個飯已經當係節目，呢種生活過咗幾年，直至佢有病，連商場都行唔到。」
我連聲道歉，因為唔知背後有故事，老闆話唔緊要，跟住再補充：「我老婆其實好鍾意旅行，佢講過好想去希臘小白屋，好想去土耳其，好想去北歐睇極光，但係有時做人真係好矛盾，未有事業之前，邊有咁多錢同埋閑情逸致去享受，但當你有事業之後就冇時間去喇，都幾諷刺，我而家賺到錢，不過已經同唔到老婆去旅行，好後悔，好內疚。」
唔識點應對，我只有繼續沉默，靜靜聽老闆繼續講：「我嫌自己當時陪得老婆太少，根本就應該放低所有嘢陪佢行埋最後一段路，但係我太太好體貼，佢成日話男人冇事業冇錢係唔得，仲話醫病都係靠我賺錢，唔想咁任性要我二十四小時留喺佢身邊，所以從來唔介意我忙，更加千叮萬囑叫我把握機會搏殺。」
我：「你太太真係好好。」
老闆：「係呀，好到冇人可以替代，我好嬲當時嘅自己淨係識得忙忙忙，做老闆又點？失去嘅始終比得到嘅更多，其實諗真啲，搵錢都係想同屋企人過好生活，咁點解又要掛住搵錢而忘記咗生活？你嘅工作今日做唔完，仲有聽日、後日、下星期可以繼續做，但好多嘢係唔等人，太太走咗之後我唔畀自己再OT，唔畀自己再喺放假嗰陣覆email，亦都唔畀自己嘅員工OT，世界上仲有好多嘢等緊我哋，朝9晚6乜都夠晒啦，人生唔應該擺咁多時間喺office。」
聽過另一位同事講，老闆曾經見過一單新聞，係外國有office如果夠鐘仲唔走，set晒電動裝置嘅枱枱凳凳就會自動升高，搞到同事迫於無奈一定要執嘢鬆人，老闆話好想裝返一set，可惜太貴，唯有每晚6點開聲叫大家走，最遲去到6:30pm就衝出嚟好似趕羊咁。
嗰位同事話：「有次我未執完嘢，佢一支箭就標出嚟熄燈熄冷氣，老闆真係癲㗎！」
我就好鍾意喺呢間公司返工喇，雖然最近試過一次搭正6:30未走得，老闆一嘢撳我電腦個power掣監生熄機…… 好在個file係auto save咋！
老闆話，太太走嘅時候先得43歲，喺佢心目中仲係好後生，一心以為慢慢賺夠錢，兩公婆老啲先周圍去旅行，點知最後等唔切，所以唔好大安旨意覺得60歲退休，65歲拎強積金，然後就舒舒服服嘆世界，好多嘢其實唔會跟時間表，唔會畀你有準備，活在當下先至最重要。
投稿讀者：Sherman
好老闆可遇不可求，你對呢個舊故事有冇印象？
《90後驚做唔長，80後話唔夠搏，70後嫌人工貴》
https://hkofficedaily.com/?p=11278