大約兩年幾之前，我幫一間公司請司機，其實只係順口問咗HR姐姐一句：「係呢，唔知有冇啲提示，我個求職者到時會唔會試埋車？或者有冇咩要特別留意？」
HR姐姐十分幫忙，細心解釋咗個流程畀我聽：「到時會先同我加埋老闆傾計，如果真係ok，就會安排佢落樓試車，因為佢第日主要係車老闆去巡舖，你叫佢睇熟我哋個website，入面list晒啲分店出嚟，照計老闆唔會叫佢揸去太遠㗎喇，預備下油尖旺嗰幾間分店嘅路線就得，同埋有啲分店門口好難泊車，有啲又係商場，你叫佢要計劃好邊個位置放低老闆。」
我：「唔該晒你呀！」
HR姐姐：「呀！仲有，車老闆點都要穩陣安全，另外要識用啲關於交通資訊嘅App，萬一塞車或者有咩突發事要執生，老闆會睇佢識唔識用呢啲配備。」
解釋得好詳盡，我亦轉達咗畀應徵司機呢位爸爸級求職者知道，對方連聲道謝，因為佢最初以為試車只係喺公司樓下兜幾個圈。
見完工，搞掂咗！我亦都一直同呢位HR姐姐維持良好關係，早兩日佢搵我幫手請back office嘅人，臨收線同我講咗句：「你之前幫我請嗰個司機真係好好。」
我：「無啦啦做咩提起？」
HR姐姐：「上星期我奶奶喺屋企跌親，嚇到我半死，即刻執嘢早走，嗰陣時又慌又亂，喺條街又截唔到車，老闆個司機咁啱停咗架車喺樓下抹車，佢二話不說車咗我去醫院，佢仲想喺醫院等埋我，睇下有咩事需要幫忙，後來係老闆要車先call咗佢走。」
其實我一直都冇同HR姐姐講，當年呢位求職者見咗幾份工都衰晒，屋企仔細老婆嫩，真係等住呢份工嚟開飯養家，佢話自己去見工唔會有咁多細節同tips，經headhunt先可以知道試車路線同安排，我話唔關我事，headhunt可能會收到料，亦可能會畀個客跣，所以好人嘅係HR姐姐，功勞亦都全歸於呢位HR姐姐。
司機哥哥聽完之後好感激對方，只係佢長期喺公司樓下或者停車場standby，HR姐姐就長期坐office，兩個人根本冇乜機會交談，不過司機哥哥一直都冇忘記過別人嘅恩惠。
世界上所有嘅善與惡，無論係過咗兩年定係三十年，無論發生喺2019年定係1989年，只要係有良心嘅人都一定唔會忘記。
整唔切圖，趕住收工有地方去，sor~