過年後被公司裁員，過程冇話好嬲或者唔愉快，因為cut人嘅消息已經傳咗一段日子，算係有心理準備，只係點都好，剛滿58歲嘅我始終會淆，年紀咁大，你估搵工容易咩！
幸運地，不安感只係維持咗一段短時間，好快就有唔少見工機會甚至direct offer，短短一星期我去咗5次interview，3份見成咗，一份我唔鍾意，另一份就傾到一半大家都覺得唔適合，而如果唔係揀定咗其中一份，其實我仲有4份工可以見。
唔係想曬命，只係想講所有嘅interview都由朋友、舊同事，同埋前下屬介紹，而呢班恩人其實都當我係恩人。
其中一個介紹我工作嘅前下屬，8至9年前跟我，佢當年得20幾歲，然後做咗我一生人都冇做過嘅事－－－裸辭，佢嗰陣話去追夢做啲同演藝事業有關嘅嘢，後來因為發展得唔順利，又想返入朝九晚六嘅職場，由於嗰幾年追夢令佢CV嘅傳統工作履歷近乎空白，搵工處處碰壁，我知道咗就介紹佢去一個client嘅公司做，工都唔使見就請咗。
另一個介紹工作畀我嘅係朋友，我冇幫過佢搵工，但就介紹過工作畀佢老婆。阿嫂之前一直係OL，有咗BB後就成為全職主婦，因為屋企支出大，幾年後阿嫂需要再投入職場幫補家計，可惜全職主婦嘅幾年空窗期令佢見工時備受質疑，結果我推薦朋友嘅老婆去我舊公司做。
講起舊公司，有位舊同事今次都介紹工作畀我，而其實兩年前佢決定移居英國時一直搵唔到工，我有個friend就係去咗倫敦開公司，需要一位英文同國語都流利嘅香港人，咁就直頭介紹佢兩個喺倫敦見啦，最終一拍即合，成個過程我只係用WhatsApp line up佢哋。
感恩臨老失業會有咁多人伸出援手，噚晚好認真去計，原來我至少幫過10個人以上搵到工（而我並唔係做HR或者Headhunt），一知道對方有需要，我就會諗下身邊有咩渠道同人脈，唔係咩施恩莫望報咁清高，我當時幫人嗰陣，根本冇諗過自己咁大年紀先畀人裁，慶幸以前曾經埋下過呢啲種籽。
就好似《九龍城寨》裡面嘅一句對白，你幫人，人幫你。