公司有個叔叔係負責做類似office boy嘅工作，出去交收文件、交錢、幫手添置一啲物品，雖然都係零零碎碎嘅事，但佢做咗好多年，大家都習慣有佢存在，點知叔叔早排因為健康問題決定辭職，同事們唔捨得之餘，亦要搵返個差唔多功能嘅replacement返嚟。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
叔叔呢種office boy或者叫做辦公室助理嘅工作，某程度嚟講係冇學歷同技能要求，其實熟能生巧就得㗎喇，都係一啲手板眼見功夫，但由於人工唔高，我哋畀呢個position嘅budget只有$13,500，故此搵人只可以向年紀偏大嘅人士埋手，始終而家fresh grad好多都去到萬七八，如果得13,500請個後生仔返嚟，邊有人睬你吖！
不過想搵返個類似叔叔嘅人亦都唔易，有一定年紀其實可以去做保安，有啲齋坐之餘人工仲唔錯，我哋呢度大熱天時要人送件，真係唔易請。
因為食飯嘅時候同朋友呻咗幾句，估唔到隔咗幾日竟然有人介紹畀我。
「上次食飯你係咪話想搵個office boy呀？冇學歷冇經驗要求，唔係後生仔都得吖嘛，仲請唔請？我同事話有friend想做喎！」
咁迂迴？我同個朋友講，朋友就介紹佢同事個friend……不過唔緊要啦，最重要係有人。
我：「係呀，冇乜要求，反而係對方知唔知人工得萬三蚊左右？」
我朋友：「提過㗎喇，好強調得萬三，少過做保安，咁我同事都話佢個friend有興趣，即係冇問題啦！不過講明先呀，我唔識嗰個人，都未見過嗰個人㗎！」
我：「冇問題，有冇CV？或者有冇contact？我約佢上嚟見工。」
結果朋友畀咗contact我，我用WhatsApp聯絡嗰個人，得悉對方叫Eric，CV就冇喇，但唔介意隨時上嚟見工，都好啦，有時請年紀大嘅人都會遇到冇CV嘅情況，咁我公司呢個position又唔需要執得咁正嘅，不同情況係要變通下。
呢位Eric按照約好嘅時間上嚟interview，我真係嚇親，點講好呢，佢唔係後生仔，中佬啦，但係距離我公司呢個position想請嘅人同埋年紀，似乎差好遠喎！
Eric：「Hello我叫Eric，我知㗎喇，人工同埋工作內容我都清楚，上次你喺WhatsApp又講過，我朋友又講咗啲。」
由於Eric冇CV，佢只係上到嚟先即席填form，我見到佢今年33歲，中學畢業，然後工作經驗一欄冇填任何嘢，大佬呀，雖然係朋友介紹啫，你都係咁易填啲資料吖，我要畀人事部㗎！
我：「Eric，你好後生喎，33歲。」
Eric：「唔後生喇，畀人叫叔叔㗎喇！」
我：「I mean……做呢個office boy嘅位會唔會……因為我哋之前係由一個50幾歲嘅叔叔做開。」
Eric：「冇問題呀，咁我年青過佢唔係仲好咩，你WhatsApp都話平時要頻繁去政府合署嗰邊整文件。」
其實我唔係呢個意思，三十幾，無論之前做任何行業都相信累積咗一定經驗，呢個position對佢將來搵工唔會係一個credit，同埋萬三蚊，男人呢個黃金年齡真係ok？
我：「Working experience呢一欄要麻煩你填埋佢，因為人事部要入file。」
Eric：「我之前冇打過工㗎！」
我：「冇打過工？係咩意思？做freelance兼職之類？」
Eric：「唔係唔係，全職同兼職都冇做過，如果喺度返工，呢度就會係我第一份工。」
我：「咁樣……之前係working holiday？進修？」喂，我潛台詞係你學歷寫中學畢業，咁就算你讀埋大學，廿幾歲先畢業好冇，而家33歲喎，之前幾年去咗邊？
Eric：「實不相瞞，我之前有人養，所以唔使打工㗎，我打工經驗係零，所以一聽到朋友話你呢度唔使相關經驗，唔睇學歷，我已經叫個朋友一定要介紹喇！」
我：「哦……有人養……」唔係想重複佢講嘅嘢，係我個腦消化緊佢講乜，即係屋企好有錢，老豆老母養係咪？
Eric：「食軟飯囉！畀條女飛先搵工咋！」
Oh…佢自己答咗，然後我個腦需要更多時間消化，因為眼前呢位Eric外型好普通，唔係高大，唔係威猛，樣貌唔係衰，但一定唔係靚仔，四眼，有少少似陳寶珠個仔楊天經，不過Eric起碼肥一個碼。
唔係話楊天經唔靚仔，費事得罪人，但係Eric哥你咁嘅款頭食軟飯？Are you kidding me？
我：「食軟飯…即係有個女仔養你喇喎！」
Eric：「係呀，每個月都畀錢我用，仲買架車畀我，住佢屋企，一齊十幾年喇，話分手就分手，冇辦法啦，咪搵嘢做囉！」
我：「咁你嗰陣時主要陪個女朋友玩？」
Eric：「唔止玩㗎，佢返工我咪買餸煮飯囉，屋企家務我做囉！服侍得佢好周到㗎！即係好似而家嗰啲全職爸爸咁之嘛，不過我哋就冇結婚冇小朋友，蠢，應該一早同佢結婚先啱，結咗婚就唔會咁易分手，我就唔使而家先出嚟搵嘢做。」
唔知佢真定假，我甚至有一刻唔知自己聽緊乜，但Eric精神狀態係正常，仲覺得之前有人養係好威，同埋冇理由一個人搵工會特登作個咁嘅故事出嚟，33歲又完全冇任何正職同兼職工作經驗。
最終我使出interview最老土嗰招：「因為呢兩日仲有人嚟見工，有消息即刻通知你。」
Eric：「吓，仲有人見㗎？唔係朋友介紹一定請我㗎咩？」
本身係，不過……我都唔知點形容，諗諗先啦都係。(完）
幫舊同事做姊妹有後續比悲傷更悲傷的事｜新娘：婚禮好後悔搵你哋，不負責任，離間我同老公
https://youtu.be/g1E8u-LH7Dc