未見呢份工之前，其實我已經知道請硬，因為in我嗰個男人追緊我家姐，聽講追咗幾年，一直都係兵。咁我家姐係幾靚嘅，兵仔亦唔止一隻，之前我話要轉工，又唔知做乜好，家姐就即刻call咗佢呢隻叫Ivan嘅男仔幫忙。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
家姐：「Ivan，之前咪聽見你話幫公司請人嘅，你係咪話得事㗎？我細妹搵工呀，你安排佢入去做啦！即請啦係咪？要唔要做樣見下？」
見到我懶懶閒喺屋企廢，又冇乜行動搵工，家姐竟然喺未經我同意之下call隻兵幫忙，就咁喺隔籬打咗個電話，而我就打咗個突。
我試圖截停家姐，但佢冇理我，繼續喺電話度質問對方：「咁你in一in佢冇所謂，最後一定請就得啦！如果你請咗佢，我畀你請我食飯。」
人哋請咗你個妹，唔係你請人食飯，係畀人請你食飯，家姐都幾惡，亦可見呢個男人有幾咁死心塌地。
最終我有去見工，懶啫，唔代表我唔等錢用，唔通咁大個女仲攤大手板問屋企人拎錢咩！上到去我先知呢個Ivan係間公司裡面唯一嘅HR，不過我連自己in咩position都唔知，斷估HR唔係惡到話請就請啩，照計過到佢都要過埋department head先正路喎！真係隻手遮天？
Ivan：「Hello，你就係Edith個妹？點解你兩個唔似樣嘅？」
得啦！知我家姐係你女神喇，家姐靚過細妹有幾出奇呀？
我：「哦，家姐靚好多，可能我唔係阿爸阿媽親生。」
Ivan：「傻啦，哈哈！點會呀，Edith成日喺我面前提起你㗎！係喎，你家姐呢排好忙咩？約親佢都話唔得閒。」
我：「都幾忙，我見佢有拎公司嘢返屋企做。」
Ivan：「唔怪得啦！有時WhatsApp佢，直頭隔兩日先覆，我都估到佢忙㗎喇，唔知係咪忙拍拖啫！」
我：「哈哈哈哈哈…..」
Ivan：「哈哈哈哈哈…..咁你家姐即係有冇拍拖？」哦，原來上一句係問題嚟㗎？等我仲應酬式哈哈哈。
我：「佢啲嘢我真係唔知喎，應該就冇喇，佢咁忙。」我唔知家姐感情狀況係真嘅，因為佢唔會同我傾，但家姐忙就係假嘅，我答冇係出於「本能自衛」，你知因愛成恨好鬼恐怖㗎嘛，一陣影響到我連份工都冇埋就唔好啦！
Ivan：「咁又係，同埋你家姐真係呢……有時我都唔知邊啲男人先至襯得起佢，不如你講多啲你家姐嘅嘢畀我聽吖！」
我諗唔止我呢個當事人，就算你睇文字，睇睇下係咪都忘記咗我上嚟係為咗見工……同埋你有咩就問啦，無啦啦點樣講多啲家姐嘅嘢畀你聽呀？你想聽咩呀？我一出世就識佢，你想知啲乜？由細個開始講起好唔好？
因為我係搭正3點去interview，加上最初佢冇畀form我填（後來入職先填返），所以我望一望隻錶係3:25，咁就已經輕易計到呢位Ivan用咗25分鐘問家姐嘅事，期間冇講公事，冇問我拎任何嘢影印，冇問我工作經驗，冇睇我任何一張cert或者reference letter……
我：「唔好意思呀，想問下其實我係in咩position㗎？我之前淨係做過CS，不過時間唔長，然後做過sales，唔係office嗰啲sales，上一份喺葵廣賣衫，我有少少擔心未必適合你公司，驚做唔嚟呀！」
Ivan：「咪得囉，唔使驚做唔嚟㗎！」
我：「咁即係做咩職位？」
Ivan：「做我Assistant吖，不過你title會叫HR officer，因為人事部得我同埋你㗎啫！」
我：「人事部？HR喎？我未做過㗎喎！」
Ivan：「得㗎喇，老細本身都話要請個人返嚟幫我，邊做邊學咪得囉！主要工作都係in下人，你之前做Sales吖嘛，咪又係日日見人，日日同人溝通，一樣啫！」
我：「唔一樣喎……」
Ivan：「19,000啦好冇？人工19,000起步。」
我：「19,000呀？咁一樣喇，我諗我都ok嘅！」
老老實實，我之前葵廣返Sales真係冇19,000，再之前做CS都係得15,000左右，19,000邊做邊學囉！！！最多咪去進修。
最後5分鐘先至入正題面試，嚴格嚟講根本唔係interview，呢個Ivan未去到可以操縱公司請咩人，但佢自己請個HR officer就可以話事，因為呢個position淨係under佢吖嘛！
而更大嘅驚喜係，夜晚返到屋企話畀家姐聽之後，家姐竟然打去鬧Ivan，問點解2萬蚊人工都冇，又問點解得12日大假咁少，最後Ivan話12日大假係policy，真係改唔到，不過人工可以加多1,000，齊頭出夠20,000畀我。
連人工都可以彈弓手？我第一次覺得家姐收兵原來係可以造福屋企人。
或者你會話請人可以咁求其，間公司肯定係垃圾！唔緊要，雖然我take咗個offer，但我同你一樣，都係覺得間公司亂咁嚟，堅垃圾！只不過我係既得利益者，人不為己，天誅地滅，唔通我又主動減返人工咩！反正啲錢都係老細出，Ivan純粹慷他人之慨，我冇理由唔接受啫！（完）
老細搵個女做臥底 同事一早知穿崩位
https://youtu.be/7MzCnEQ0hlc