正當我好專心做嘢嘅時候，有個叫Allen嘅同事遞咗兩張$500蚊紙畀我，本能反應當然係問佢做乜？估唔到呢位男同事竟然講咗句：「瀨L咗嘢！頭先send quotation出去嗰陣，唔小心send咗畀第二個客，啲價錢係唔同，呢次真係仆街喇，你救救我！」
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
我：「點救你？你不如搵IT問下可唔可以收返個email啦！」
Allen：「問過，佢哋話冇得搞，講咗啲唔知講咩嘅IT術語，又話要睇對方用咩email，總之收唔返。」
Allen講咗咁耐，隻手都仲係拎住兩張$500蚊紙，依然係遞住等緊我收。
我：「收唔返都冇計，你做咩啫？」我用眼神望住啲錢，用意係問佢遞錢畀我做咩？
Allen：「$1,000幫我頂，得唔得？」
估唔到今時今日，竟然有人會用錢喺office玩「賄賂」，$1,000食隻死貓，你都幾好笑。
我：「你係咪CLS？你做錯嘢要我頂？仲要畀錢？搵ICAC拉9你吖嗱！」
Allen：「咪玩啦！仲有ICAC㗎咩？認真㗎！我個試用期又延長咗，幫幫手啦，而家都就嚟年尾，一陣畀阿頭雞咗，我都冇信心喺年底前搵到另一份工，唔該吖！」
條友認真㗎喎！
我：「拎開啦！$1,000要我扮係自己做錯，痴線！你當我係咩呀？」
Allen：「如果$1,500呢？」
唔係呀？咁都有得講價？
Allen：「$2,000啦！不過今日我袋得$1,800，畀住你先，另外兩嚿水lunch再撳埋畀你。」
我：「Um……ok！嗰兩嚿水算啦！係咪真係$1,800？」
Allen：「多謝大佬！嗱，即刻磅水畀你先，記住喎，個email係由我send出，我一定要話份報價係你畀我，有起事上嚟你要話自己搞錯，畀錯咗資料我，咁我個角色係咩都唔知嘅，最多衰冇double check啫，總之罪魁禍首係你，有冇問題？」
我：「得啦！冇問題，幫你打埋畀個客講清楚，我親自打去，全套服務，得未呀？」
現兜兜收咗Allen $1,800，我亦都真係提供咗「全套服務」，而其實收錯報價單個客根本唔care，亦冇嘈任何嘢，阿頭當然亦唔知道，所以呢單簡直係easy job!
Allen冇話自己係有錢仔，但我覺得佢家境應該唔錯，又怕冇咗份工，但又肯出$1,800叫人食死貓，最大原因係佢根本唔等錢用，Allen話佢老豆老母好煩，唔可以冇嘢做留喺屋企，加上老豆睇死佢做做下又轉工，所以Allen先至咁介意做錯嘢畀人炒。
不過Allen做嘢真係好唔掂，粗心大意，又冇責任感，因為佢大大小小嘅錯都犯過，所以阿頭先至會延長佢試用期，唔止一次，係延長咗兩次，Allen入咗嚟7個月，到而家都未過試用期。
據我所知，因為Allen份人係幾好玩，又多嘢講，阿頭係鍾意佢喺度好熱鬧，但Allen有時啲過失真係會有被炒嘅危險，阿頭一直想請人代替，可惜見咗幾個都唔啱，跟住又不了了之，所以Allen先可以留到而家，相信過埋今個月，Allen都會正式過試用期㗎喇，所以佢先會咁緊張要畀錢我頂罪。
呢單嘢我同咗另一位好熟嘅同事講，估唔到嗰位同事話我知：「我都執過Allen $2,000啦！」
我：「咁你幫Allen頂咩呀？」
「冇頂咩呀！有一次佢咪11點幾都唔見人嘅，原來瞓過龍，佢驚畀阿頭鬧，WhatsApp問可唔可以扮同咗我講，話佢嗰朝有打返嚟請病假，係我唔記得同阿頭轉述，一開價就$2,000，嗰期我條女生日，又要食飯又要買禮物，所以咪應承佢囉！」
我：「最後呢？」
「最後我咪11點幾扮晒嘢同阿頭講，呀！Allen今朝打咗返嚟sick leave，唔記得同返你講……咁囉！」
我都明白呢啲行為係好唔誠實，但又唔係頂咩殺人放火，咪當同事之間守望相助囉！即管睇下阿頭今個月尾會唔會畀Allen過試用期先，千祈唔好炒呀，因為以Allen嘅性格，瀨嘢嘅情況應該會經常出現，耐唔耐執幾千蚊幫補下都好吖！(完）