某個星期日嘅中午，我起身見到阿頭msg，佢話：「I miss u too」
當時個頭好痛，但我撳入WhatsApp睇清楚先發現，原來前一晚我飲醉酒，send咗句「我好掛住你」畀阿頭。
我阿頭係男人。
時序係咁，我同前女友分咗手3個月，始終放唔低呢段感情，因為唔開心所以約咗friend出嚟飲酒，後來貓咗，想send「我好掛住你」畀個ex，點知send咗畀阿頭，跟住佢就覆返我「I miss u too！」
至於點解會send錯，最大原因係未醉之前我有msg前女友，想約佢出嚟食飯，而阿頭就係對上一個同我msg嘅人，未飲嘢前傾緊公事。即係阿頭同前女友都係我WhatsApp最頭嗰兩個，一句講晒，我手殘！
第二日起身見到「I miss u too」，我反應唔算好大，始終未太清醒，頭又痛到炸裂，後來諗真啲就覺得好怪，想問下男仔，如果突然有條麻甩佬msg你話掛住你，你會唔會以粗口回應？相信唔打粗口都唔會答「I miss u too」啩！
星期一返到公司，大家當冇事；星期二，做緊嘢嗰陣阿頭msg我，問放工一唔一齊食飯？我話約咗人；再隔幾日，放工返到屋企，阿頭又msg我問：「仲有冇掛住我？」
我覺得自己已經回覆得好好：「
上次飲大咗send錯，咪笑我啦！」
阿頭又reply：「唔係笑你，有冇諗過係潛意識驅使你話掛住我呢？」
我再回：「真係send錯」
雖然當晚冇再msg落去，但阿頭keep住私下msg我，有時問我做嘢辛唔辛苦？有冇壓力？又話隨時可以約佢出嚟飲嘢傾計，唉，始終係我手殘在先，我係咪要硬淨啲同阿頭講清楚呢？