做HR咁耐都未遇過咁嘅事，話說我哋出咗招聘廣告請人，正常收到resume就約合適嘅求職者上嚟見工，然後其中一個女仔係我哋冇約過，亦冇打過畀佢，偏偏佢就喺receptionist手上拎到張application form，我最後更加in埋佢。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
先講下我點樣發現，當時接待處個位置坐咗兩個人，而嗰個時段我明明只係約咗一個男仔interview，咁唔排除有客或者其他vendor上嚟嘅，本身想唔理㗎喇，點知receptionist遞咗兩張application form畀我：「佢兩個都填好喇，個女仔嚟先。」
我：「吓！我約咗一個人上嚟見工咋喎！」
Receptionist：「唔係喎，佢兩個都話係上嚟interview，一前一後，所以我畀晒form佢哋填。」
點會呀？如果我約人見工一定會有印象，同埋我呢個時段約得一個，係因為之後有其他嘢做，何況我有個習慣，約人interview會print定對方份resume出嚟，方便拎住嚟見，我都冇print個女仔份resume……
我望一望receptionist遞畀我嗰兩份application form……Yvonne Lau？
我：「Hello，你係Yvonne？」
「係呀？」呢位Yvonne連隨起身行埋嚟，就好似輪到佢入房interview咁。
我：「唔好意思，我係約咗你今日見工？」
呢位Yvonne又好老實：「冇呀，你冇約我，係我自己上嚟試下咋！」
我個樣呆咗唔識畀反應，同時都見到receptionist同嗰位等緊interview嘅男仔一樣呆咗。
當時我一路盤算緊應該點做，好快就諗到3個option：1）叫個女仔走；2）in埋啦唔爭在；3）in個男仔先，始終我真係約咗個男仔，呢個叫Yvonne嘅女仔就容後再處理。
結果我嘅決定係3）+ 2)，公平起見，我真係約咗個男仔，或者人哋之後有其他工要interview呢，咁我冇理由要make咗appointment嘅人等㗎嘛，等我見完再了解下呢位Yvonne Lau係咩事。
In個男仔嘅細節我就唔交代喇，因為唔係重點，而且我in完覺得ok就即刻同個Line Manager講，Line Manager仲即刻進行埋second in，而我決定抽時間出嚟，返埋自己個位睇下Yvonne Lau份application form先，咦喂，好熟口面喎……啲basic information同埋experience，我一定有見過。
Check返求職網站個recruiter system，再check埋e-mail，原來當我登呢隻招聘廣告嘅時候，Yvonne Lau係有send過resume嚟，我亦都有睇過，最終因為佢上一份工嘅job duties唔多match到我哋position嘅工作內容，所以先至skip咗冇約。
我冇揀到Yvonne Lau嚟interview，另外揀咗兩男兩女，因為只係一日前嘅事，我100%肯定自己冇打過畀Yvonne Lau約見工，問題係佢點解會識得上嚟呢？係咪當中有咩出錯呢？
我大約了解咗咩來歷，再make sure自己冇call咗人唔記得，跟住就出返去接待處嗌Yvonne入房，既然都嚟咗，有咩就入房先講啦，始終resume太多個人私隱，接待處又多人行出行入，無謂喺嗰度討論。
由於Line Manager喺大房見緊嗰位男求職者，所以我就喺另一間細房同Yvonne傾，一坐低我就問佢：「我應該係冇約你上嚟interview㗎喎，係咪有咩誤會呀？」
Yvonne：「冇呀，你冇誤會，真係我自己走上嚟㗎，我諗住搏下，唔好意思呀，我好鍾意你哋公司，有用開你哋啲嘢，希望你可以畀個機會我見工。」
我：「但你點知我呢段時間係約咗人見工？又點識得上嚟？」
Yvonne：「上嚟就唔係好難，因為去google search已經有地址，不過我唔知你呢段時間約咗人interview，我只係計過數，通常9點大家啱啱返到公司會好忙，又有啲公司唔係返9放6，我以前公司就係返10放7，咁我唔知你哋office hour吖嘛，咪諗住11點上到嚟一定冇錯囉，膽粗粗同reception個姐姐講我想見工，然後佢就畀咗application form我喇，唔夠一分鐘，我見到頭先個男仔上嚟又係話見工。」
我：「即係你純粹搏下？」
Yvonne：「係呀，阻到你唔好意思，我真係好希望可以見下呢份工㗎！」
其實我可以用三個字形容Yvonne，就係搏大霧！我甚至喺度諗，如果個個求職者都好似佢咁，send完份resume就唔理有冇收到通知都上嚟見工，咁HR咪好唔得閒？同埋咁樣都破壞咗成個見工嘅流程。
透露下我平時出招聘廣告會收到幾多份resume，請CS或者Clerk呢類工種係最多，一個朝頭早收幾廿份走唔甩，出完廣告第一日大約收到50份，Sales就大約30幾份，會計可能得20份，比較senior嘅職位就再少啲，而其實比起過往全盛時期，而家出稿收resume已經少咗喇，幾年前出隻CS真係可以第一日就收到80至90份resume。
咁你試想像下如果每個send resume嘅求職者都不請自來，後果係幾咁嚴重，我點樣見晒咁多人？當你15分鐘in一個，一個鐘都係in得4個，唔食lunch直落in到6點都係in得36個。
把口係咁講，但我亦唔忍心就咁叫Yvonne走，都嚟咗啦，就畀15分鐘你。
意想不到嘅係，呢位Yvonne對住我嘅表現好好，佢有幾樣嘢係我好欣賞，首先係誠意同禮貌，佢表現出好渴求呢份工（我唔知佢係唔係份份工都夾硬走去搏大霧），其次係佢講嘢好流暢，而且英文仲要唔錯，同埋傾下傾下先發覺佢對上一份工原來都match到我哋個職位，只係佢resume寫得唔夠好，如果佢啲resume同cover letter執得靚啲，我可能會一早約埋佢。
請人有時真係唔可以只睇文字，我覺得以face to face嘅表現同好感度嚟講，Yvonne仲優勝過頭先個男仔。
我決定推介Yvonne畀個Line Manager，睇下可唔可以即刻再進行埋second in，啱就唔使特登再約多次上嚟。（未完待續）
呢位不請自來嘅求職者都算遇到個天使HR吖，雖然同下面個舊post相比，兩種天使係唔一樣。
見工遇到天使 好想成為同事
https://hkofficedaily.com/?p=22228