我有個朋友做Design手作仔，係啲皮革用品之類，上年喺個細商場租咗納米舖位，雖然租未算太貴，不過佢全職經營，燈油火蠟加埋自己都要生活，每個月淨利潤得幾千，結果頂唔到落去，要重新出發搵工。
其實本來可以有轉機嘅，因為上年臨放棄之前，有個國內人行過佢個場，睇中咗佢啲設計同產品，買過一兩次之後就提出合作方案，大前提係唔再用返我朋友個brand，要印佢哋喺國內嘅品牌名。
我朋友話：「佢個brand name係簡體字，個logo仲要抄A&F（Abercrombie & Fitch），隻鹿一模一樣，英文叫AF，再配個九唔搭八嘅簡體字牌子名。」
嗰個國內客畀我朋友嘅報酬係幾吸引，總之設計完就印一個老翻logo加一個簡體字brand name，不過我朋友唔制，典型Designer風骨，可惜佢阿爸阿媽唔係咁睇，當我朋友無法再負擔租金同生活而決定要結業嘅時候，兩老係咁畀說話佢聽：「多餘！咁硬頸做乜？而家咪又要執！最緊要搵到錢啫，就算去大灣區又點啫！返大陸又點呀！骨氣當飯食呀？你睇下呀邊個個仔……」
其實我朋友唔介意有人正正經經搵佢去做designer，但要遷就國內市場用老翻logo再印簡體字出賣自己嘅作品就唔得。
而家佢返正職之餘，仲係keep住去design，間唔中搵市集場賣下product，又學人研究點搞online store，但佢話一樣好enjoy，完全唔後悔當初作出嘅決定，大灣區同埋大陸好多錢搵又點？唔鍾意就係唔鍾意。
有啲嘢唔使同人比較，人哋點樣係人哋嘅事，最緊要心安理得，用自己喜愛嘅方式生活。
聽過一句說話：「唔追任何浪潮，唔趕搭任何船，因為有自己嘅一片海。」唔知係咪磁場太近，身邊好多呢類硬頸嘅朋友。