客戶上我哋公司開會，其實都傾好晒㗎喇，係爭啲細節同埋簽約作實，不過我同事前前後後講咗幾次：
「黃生，我哋呢邊會幫你拍條一分鐘以內嘅視頻。」
「段視頻我哋會搵返啲後生少少嘅演員，因為target audience係20至30呢個range……」
「黃生，呢段視頻你有冇打算喺邊啲平台出吖？」
個客突然發火鬧我同事：「你再講多一次視頻，我即刻唔簽！片就片，video就video，視咩頻呀？」
會議室靜晒，好在最後兜得返冇事。
嗰位同事後來私下話個客好麻煩，唔係麻唔麻煩嘅問題，亦真心唔係要反呢樣反嗰樣，就咁平心而論，你喺香港都生活咗幾廿年啦，學黃生話齋，片就片，video就video，大家香港人講咩「視頻」啫，人哋唔覺得Un耳，你自己講出嚟都怪啦！
雖然個客嘅反應係大咗啲，但我完全明白佢點解會發火。