呢個世界的確有請唔到人嘅工，未必因為份工好難做，亦未必因為要求好高，總之一言難盡。
小妹做headhunt，兩年前有間公司搵我哋幫手請人，對方嘅要求聽落好簡單：「大學畢業啦，一兩年Sales經驗都夠㗎喇，最緊要係女仔，因為營業部阿姐話條team多男仔，想男女比例balance啲！」
明嘅，自己出job ad唔可以點名要女仔，否則平機會見，搵headhunt有呢方面嘅要求絕對可以理解。
先後介紹咗3個求職者去見呢份工，打頭陣嘅係Shirley，個客見完冇特別feedback，唔緊要啦，第二日仲有兩位求職者包括Jennifer同埋Venus上去見，in完先一次過跟進囉！
HR：「仲有冇人呀？阿姐話三個女仔都唔適合。」
我：「可唔可以知道佢哋衰咩？呢三個女仔幾好㗎喎！」
HR：「阿姐話第一日上嚟嘅Shirley太高，驚一齊出去見客會好似under Shirley咁，阿姐覺得自己冇晒台型，Shirley有冇170呀？」
我唔會幫candidate度高㗎！Anyway，明白唔關HR事，係個營業部阿姐嘅問題。
我：「咁Jennifer同Venus呢？佢兩個都唔算特別高。」
HR：「阿姐話Jennifer太靚喇，會搶fo，同埋Jennifer太過健談，另外呢，阿姐話Venus上嚟見工拎嗰個手袋好貴，話佢個袋仲貴過佢全身，妹仔大過主人婆。」
雖然三個女仔都因為三種不同原因而落選，但你有冇發現，三個都係衰同一樣嘢，就係阿姐認為搶咗自己風頭，高唔得，靚唔得，袋太貴都唔得。後來我再send多幾份resume畀佢哋揀，結果HR都話阿姐唔鍾意。
一直好奇個營業部阿姐係咩款頭，又冇理由問HR拎個阿姐張相吖，所以我決定client visit，親自上去呢個客度，扮晒同個阿姐傾下想請咩人，實情係想知道把尺究竟要點度。
唔去猶自可，一去到見到個營業部阿姐……喂！呢單job點做呀！首先個阿姐都唔知有冇150，要搵矮過佢真係難過搵牛津劍橋畢業，其次係個阿姐副尊容……真係好難唔靚過佢喎！
算啦！唔係我財唔入我袋，單job都係做唔成㗎喇，client visit完就懶懶閒冇再跟進，點知個HR又主動打畀我。
HR：「Hello，仲有冇人介紹呀？個阿姐催我呀，話仲未搵到人。」
我：「暫時未有合適嘅candidate，有啲難度呀！」
HR：「阿姐話唔使咁複雜㗎，最緊要快，因為等人用，佢提過好似你咁樣就得㗎喇，你上次嚟公司之後，佢話就係想請你呢類型嘅女仔。」
仆街吖你！我有160㗎！當然我冇鬧出口啦，但聽到佢阿姐話想請我呢類型，嗰下真係覺得好侮辱，總之最後我都冇再搞呢隻job喇！期間我有留意佢公司原來一直都有出招聘廣告，請同一個職位，出完又出，而家兩年喇，隻招聘廣告仲不斷刊登緊。
我真係好介意佢阿姐想請我呢類型，諗起就嬲！