有好多嘢真係科學都解釋唔到，放心我唔係講鬼故，純粹想講一個叫Karen嘅女同事，幾個月前佢去日本旅行，我哋阿姐好唔識做咁叫佢買好多嘢，張清單起碼有十樣物品，包括藥、零食、波鞋、袋，仲有一大堆零零碎碎嘅化妝品，連盲抽福袋嗰啲嘢都有。
Karen話我知佢係搭廉航，回程直頭要加錢買行李，因為淨係計鞋都有5對，頂你個肺請問喼有幾大呀？咁多嘢走去搭廉航，加錢你預咗啦，所以Karen係咁同我呻，學連登班人話齋，你同我講冇用㗎，同返當事人，即係阿姐講吖嘛！你拒絕吖嘛！
Karen：「佢都唔係成日咁樣嘅，算啦！當面拒絕又唔好意思，唉，咪加行李囉！最慘係我要特登喺日本買個喼，無端端洗咗幾嚿水。」
我：「覺得唔好意思嘅應該係佢，你去4日3夜咁大把，我唔知你咩行程啦，但要幫佢搜羅呢堆嘢，起碼行咗超過10個地方，再近都要時間啦！你自己旅行唔使玩呀？特登飛去幫手代購咩！仲要無償喎！」
其實無償已經好好，Karen好多時係蝕返轉頭㗎！有個同事食lunch成日唔畀錢，十次有七次都叫人出住先，我中過招真係唔會再睬佢，唔係要計較，喂你幾廿蚊自動自覺啦，下下要問你追收飯錢真係好煩，偏偏Karen就次次幫佢出。
提過好多次㗎喇，而家咩年代，差唔多間間餐廳都有八達通，再唔係可以碌卡，咩話？冇信用卡？唔緊要，咩轉數快咩PayMe有喇啩！唔係同我講連基本銀行戶口都冇呀？冇account平時點出糧呀？而家真係唔興冇帶銀包或者冇散紙呢啲廢話㗎喇！
Karen：「佢前前後後爭我好多餐喇，頭先又話未撳錢，有時都唔記得咗total實數係幾多，唔通次次食完飯都搵本簿mark低咩！」
我：「所以你咪要次次問佢囉，幾廿蚊都『責』數？唔知以為幾廿萬！同埋你明知追返佢飯錢慘過乞㗎啦，唔好再幫佢出啦！咁大個人，食飯有義務自己畀錢呀？老奉幫佢畀咩！」
不過幾嚿水飯錢呢啲都係細數，之前有個男同事係幾千蚊幾千蚊咁向Karen借，office裡面好多人都畀呢位男同事問過（借錢），正所謂長貧難顧，一齊做嘢啫，又唔係兄弟姊妹又唔係friend，say no總好過之後有錢銀瓜葛，到時仲難收科仲尷尬。
點知Karen原來一次又一次借畀呢位男同事，有時幾百，有時幾千，加加埋埋都接近5位數字，條友真係當Karen係提款機，結果我睇唔過眼幫手追，仲鬧咗個男同事一鑊，之後Karen竟然話返我轉頭：「你做咩鬧佢呀，佢叫咗我唔好同人講㗎！」
我：「明呃錢㗎喎！首先你冇叫我唔好出聲，其次係我幫你追咋喎！」
Karen：「得啦！我自己會問，佢講咗下個月出糧會畀返我，得㗎喇，我自己搞掂！」
最後個男同事有冇還錢畀Karen？梗係冇啦！直頭轉工走埋呀！所以後來Karen又同我呻：「唉！你覺得我好唔好打去叫佢還錢？好衰囉！7月嗰陣話還，而家都幾個月喇，走咗又唔交帶，以前就話係同事啫，而家都唔係一齊做嘢啦！」
就算係同事都唔應該咁樣借啦！乜你真係覺得世界上會有同事永遠唔離職？一日同事？就一世都係同事？
以上說話我冇同Karen講，講嚟都嘥氣，幫手追數嗰次怪返我轉頭，仲有飯錢嘅事，同埋阿姐叫佢旅行幫手買嘢嘅事，哦！原來你淨係想呻，咁早講吖嘛，唔使我枉作小人同埋投入太多個人感受，因為正常人聽完都會嬲，咁下次我聽完笑一笑就算囉！
其實Karen呢種係咩心態呢？唔識say no，角色人設一定要做好人？被搵笨又講到萬般不願勁委屈，然後對住搵你著數嘅人又好似鵪鶉咁，我真係諗唔通，以後聽到都係唔好咁上心。