我公司近旺角新世紀廣場，大家有冇遇過一位出沒於行人天橋嘅變態佬？佢次次都係從彌敦道方向行去新世紀，然後故意踩人腳踭，見過好多人畀佢踩到甩鞋。
大部分人可能冇為意，就算目擊到都會認為係唔小心，但我哋班同事成日行嗰度去放飯，一早知佢係專登，所以眼尾「哨到」條變態佬出現喺天橋就會好防範。
後來公司嚟咗個男同事，佢見過一次變態佬踩人之後原來默默記住，某日呢個場面又再出現，嗰位男同事突然離群行去個變態佬後面，趁變態佬出腳踩人之際，男同事黃雀在後快一步，好狠咁踩落變態佬另一隻重心腳嘅腳眼位置，我見到都覺得痛，個變態佬直頭成個跪咗落地，我哋睇到呆咗，而男同事仲要無所畏懼企定定睥住條變態佬，再施施然行開……
另外，旺角彌敦道仲有一個傻佬，成日會行去人哋身邊突然大叫，佢應該精神有問題，次次都嚇到人彈起，咁梗係啦，無啦啦有人喺你耳仔邊大叫喎，真係驚㗎！
原來我男同事又留意到，有次喺近女人街嗰頭見到傻佬嚇人，男同事失驚無神走去個傻佬身後，好大聲咁嗌：「DLLM！」個傻佬嚇到原地彈起，真係彈咗一下，好似孖寶兄弟彈起頂水渠咁。個傻佬睥咗我同事幾秒，跟住就自己行開。
我有問男同事點解咁勇，男同事話：「先唔理呢種人係真傻定心理有問題，你有冇發現佢哋都係欺善怕惡？專揀女仔同細路哥埋手，其實沿路有男仔有紋身佬，但佢哋唔敢搞人，所以你唔畀啲教訓佢唔得㗎！呢啲報警都冇用。」
細心諗返又好似係，例如天橋個變態佬，次次都係踩OL嘅腳踭，而喺彌敦道大嗌嗰個傻佬，永遠見佢都係嚇女人、師奶、阿婆，同埋女學生，身邊有男人經過就會好正常，的確係揀人嚟恰。
可能呢排時運高，我都一段時間冇見過「踩腳佬」同埋「大嗌佬」，唔知同我男同事以暴易暴有冇關呢？
不過呢，因為阿姐次次都同我哋一齊放飯，所以兩次「以暴易暴」嘅過程都有目睹，阿姐唔多like男同事咁做，話咁樣會損害公司形象，補充少少，我哋份工有類似制服，件衫有公司logo，冬天加件外套就睇唔到，但夏天通常就咁著住行出去食飯，總之而家阿姐係麻麻地呢位男同事。