上年因為有段時間搵唔到工，所以我搵咗份麥當勞嘅兼職做，話就話係part time每個月幾千蚊，不過我自己當全職，起碼唔使攤大手板問屋企攞錢。其實呢段時間我都有繼續搵其他工，可惜冇乜回音，Send CV多，Interview少，所以麥當勞份工一直做到而家。
我做嗰間麥當勞雖然唔係喺正自己屋苑，但如果搭港鐵都只係隔一個站，新年嗰段時間返工遇到個親戚嚟買嘢，其實好正常嘅，香港有幾大吖！而且咁多人食麥記，差在幾耐一次同埋去邊間買啫！當時個親戚仲好好人咁同我傾計，好似好關心我做得慣唔慣。
「哎呀，阿瑩你而家喺度返工呀？慣唔慣呀？好辛苦㗎喎！」
我：「Ok呀！份份工都辛苦啦，我做咗幾個月㗎喇！」
個親戚突然悄悄話咁細聲問：「你媽咪知唔知你喺度做呀？」
真係滿頭問號，唔知以為我出嚟做……其實我做麥記咋喎！何況你而家都喺麥記同我講緊嘢，唔使突然咁細聲驚人聽到呀？
我：「知，點會唔知呀？返工啫！」
再同佢講多兩句，我已經唔想再糾纏落去，求其話要做嘢就行開咗，當時就有種預感，件事一定唔會就咁結束，果然！
同日夜晚返到屋企，阿媽就問我今日係咪撞到德叔老婆，然後話全個家族都知我做麥當勞……
我：「係呀，今日德叔老婆嚟我間分店買嘢，已經畀佢問長問短，好在佢係買走唔係堂食，其實佢咩事啫？好似發現新大陸咁！仲講到好似我瞞住你返麥當勞，打份工啫，而家作姦犯科咩！定係姦淫擄掠呀？」
我自己都愈講愈激動，咁係嬲吖嘛！返個麥記啫，畀你周圍唱通街，麥記返工犯法呀？
阿媽：「你阿爸打咗去鬧佢啦，頭先仲同德叔喺電話度嗌交。」
原來德叔老婆唔係搵我阿媽，佢係見到我返麥當勞之後打晒畀全部親戚，話我唔生性，讀咁多書走去做麥記，要剷薯條要收托盤要洗廁所，其實佢當時根本睇唔到我做呢啲工作，只係見咗我一眼，跟住就腦補咁多畫面出嚟，不過重點都係要喺班親戚面前唱我。
最好笑係我婆婆聽到之後好鄙視，唔係鄙視我，係鄙視德叔個老婆，因為我婆婆係好多粗口嘅老人家，阿媽話婆婆咁樣同德叔老婆講：「屌！多L餘！我一早知啦！使鳩你講呀！」
你想唔想像到？我婆婆仲要係有啲鄉下話口音，好粗豪嗰隻。
我：「估唔到阿婆咁惡！」
阿媽：「你阿婆不嬲都係咁㗎啦，唔夠你阿爸惡，佢頭先打去鬧德叔老婆呀！」
係呀！我老豆仲激動，打去鬧德叔老婆不懷好意，周圍同親戚講我做麥當勞，出發點係想踩低我，因為已經有親戚打嚟同返我阿爸阿媽講，話德叔老婆覺得我讀咁多書唔搵份「寫字樓」係失敗！係懶！係廢！
我阿爸就喺電話度鬧德叔老婆：「我個女做咩工關你鬼事呀！佢讀書啲學費同書簿費你出㗎？我係佢阿爸都未出聲，你有咩資格出聲呀？警告你唔好再搞搞震，親戚都冇得做呀！」
聽阿媽講，後來德叔知道老婆畀人鬧，又加入戰團打返電話嚟同我阿爸嘈，親戚就一定做唔成㗎喇！
講真我都唔明德叔老婆係咩心態，覺得做麥當勞係唔見得人好失禮？覺得我影衰成個家族？影衰我父母？的而且確，佢冇用「影衰」呢啲字眼講出嚟，不過本意就肯定係睇唔起我，唱衰我，麥當勞係正當職業嚟㗎，做咩啫你？點解做麥記就係唔生性？
經過今次之後，我反而件覺得阿爸阿媽好好，好多父母都會畀親戚嘅說話影響，從而認為自己嘅仔女唔夠人哋叻，但我阿爸阿媽完全唔覺，仲嬲過我本人。
作為一個失業之後搵唔到工，信心一度跌到落谷底嘅人，可以將麥記當係一個中途加油站確實唔錯，至少我唔使困喺屋企，可以每日同外界接觸，keep住有返工嘅節奏。
最近開始覺得自己抖夠喇，並非受到呢件事影響，只係「休息完」咪試下轉新環境囉！而無論我幾時唔做都好，我亦唔會後悔自己曾經做過麥記，更加唔怕喺返工時間遇到德叔老婆呢種人。
有啲人要睇你唔起，其實你做咩都會睇低你，最緊要係自己唔好受呢種無關痛癢嘅閒人影響。
（完）