恐怖又痴線！之前返咗份新工做到懷疑人生，第一日朝早阿頭介紹其他同事畀我識嗰陣，一個二個已經藐嘴藐舌，同team同事喎！唔係其他部門同事喎！
出嚟社會做嘢，你唔可以要求每個同事熱情如火，咁我就以為佢哋只係比較cool啦，但事實唔係咁，唔係cool咁簡單，班同事直情係憎我。
阿頭叫佢哋教我嘢，冇人教，冇人理，結果我成碌葛咁坐喺度，自己慢慢睇慢慢摸索，咁嘅氣氛過咗兩日，最後由阿頭親自出馬教我。
食lunch，冇人叫我，佢哋會成班自己出去，可能你會話：「咁大個人咪自己食囉，小學生一定要黐住人食咩！」啱呀，呢個道理我當然明白，只係你身處其中就會知道嗰種唔尊重同埋唔禮貌嘅對待，好難避免會有hard feeling，簡單啲講就係當你透明，唔使咁呀？大家打工都係搵食啫！你話我得罪咗班人，做錯嘢在先，咁都冇嘢好講吖，問題係我連做錯嘢嘅機會都未有，我返工咋喎！
枱面有個tray我唔需要，拎開咗啫，有個同事喝我，係大聲喝，叫我唔好搞個tray，因為擺咗喺度好耐喎！下，我有冇理解錯？呢個位係我坐㗎喎，我個位想點擺嘢，擺啲咩，擺開啲咩，加啲咩，全部都要有同事approve？我唔係亂丟公司嘢，又唔係將啲嘢亂咁放喺其他人嘅地方喎，個tray只係放入自己張枱最低最大嗰格櫃桶，咁都要申請？就算係老細都唔會規限我點郁自己張枱啦！
返咗一個星期，同team呢班同事除咗喝我嗰次之外，從來未同我講過嘢，嗌佢哋早晨唔應，lunch唔叫，放工唔講bye bye，問佢哋嘢永遠得一個答案，就係：「唔知喎！」問咗幾次都係咁，我都冇再問佢哋喇，例如我要用個影印機，初時唔知入staff code等程序，自己企喺copy machine前面研究，隔籬team同事咁啱路過見到就教我，所以我同其他部門啲人反而有打招呼有計傾。
頭幾日返工唔想畀人感覺好似八婆，所以勒住自己唔好問啲無謂嘢，但係做咗一個禮拜仍然畀同team同事杯葛排擠 ，我相信都係時候問清楚咩事，結果我喺pantry膽粗粗問隔籬team個同事，終於有少少端倪，佢哋話我個position係replacement，上一手同事叫阿宜，同我team啲人好friend，感情好好，不過做嘢就好唔掂，成日請假，朝朝返11點（公司返9點），我阿頭忍無可忍炒咗阿宜，所以同team同事好嬲好唔忿氣，難怪佢哋對住阿頭嘅態度都麻麻。
咁啱阿頭話仲未請我食welcome lunch，約咗我出去食晏，其實佢有嗌埋其他同事，不過冇人去，個氣氛真係尷尬又難受，都好嘅，趁住lunch time同阿頭兩個，我一五一十講出自己嘅感受，再直接問下阿宜件事係真定假。
阿頭承認的確有件咁嘅事，阿宜係唔炒唔得，一個月平均請8至10日假（唔計星期六日基本你係返20日左右，連續半年都係每個月請8至10日真係……有啲誇），不過阿頭話有醫生紙冇理由唔畀同事拎假，所以最難忍反而係朝朝返11點，有時阿宜返10點幾，同team幾個同事仲會話：「今日咁早嘅？」阿頭直言感覺崩潰，既然半年都冇改善，冇理由唔炒佢吖，再咁落去唔係辦法，更強調係炒得遲。
Anyway，炒人之後引起同team幾個同事不滿（我哋條team係全女班），仲有人話應該畀多次機會阿宜，聽講阿宜亦有托同事轉達想返嚟做，只係阿頭不為所動，輾轉間請咗我，所以阿頭都feel到同事認為我嘅存在係斷咗阿宜後路，叫我忍耐下，應該過一排就冇事喎……唔怪得擺開個tray都要喝我啦，佢哋覺得我侵佔咗阿宜嘅地方。
不過唔好意思，我唔玩喇，唔想評論阿宜係咪抵炒，但係同team同事杯葛同埋排擠嘅行為我唔認同，亦自問冇辦法改變，你哋個friend冇得做其實唔關我事，出嚟搵工搵食唔通顧埋上一手同事係點？我冇做錯野，唔應該受到呢種對待，更加唔希望喺呢種氣氛之下工作，同你哋作對或者嘈交有失身份，受你哋氣亦都頂唔緊，我決定辭職搵過另一份新工好過。
其實新人返工已經要適應好多嘢，冇support唔緊要，但都唔好用冷暴力去排擠吖！
投稿讀者：受害人