「做得好地地點解唔做呀？過埋年底review人工㗎喇，呢度興農曆年放假返嚟就加薪，因為老細都驚你哋拎完雙糧走人，你而家遞信好唔抵，我哋辭職3個月通知㗎嘛，11月、12月、1月，你last day嘅時候都過年啦，resign咗咪冇double pay囉！」
下屬Lawrence要走，為公為私我都想留住佢，一來條友仔都幾醒目，二來我唔想年尾少咗個人，請人又麻煩，等陣老細cut budget唔再請返就更煩，何況人性化啲去諗，點解唔拎埋雙糧咁蝕呀？點知Lawrence答我：「唔等到一月喇，我聽日quit，賠三個月張票轉頭開埋畀人事部。」
作為人哋上司，我都忍唔住講咗句：「你有冇咁型呀？」
Lawrence：「妖！型咩吖！講埋啲衰嘢，我25,000一個月，想問下賠三個月係咪開張75,000支票？仲有兩日大假點扣，使唔使扣起MPF啲錢先開？唉算啦，我直接問人事部，費事一陣寫錯銀碼又要開多張。」
我：「當你可以減兩日假同MPF，賠三個月都係7字頭走唔甩，已經冇埋雙糧，你呢度損失加加埋埋六位數喎！」
Lawrence：「我阿爸叫㗎，佢想我過去澳洲陪佢玩一頭半個月，嗱，辭職信畀咗你喇，我搵人事部先，唔同你講住。」
我覺得貧窮真係限制咗自己嘅想像，賠7萬幾再冇埋雙糧，如果係我應該十日十夜瞓唔著，但係對Lawrence嚟講只係散紙，我一早就知道佢屋企有錢，佢嘅7萬幾，應該係等於我嘅7個幾，不過我跌咗7個幾都會肉痛。
最癲係我班下屬裡面，有錢嘅唔止得Lawrence，另一位叫阿Mark嘅同事仲浮誇，佢日日揸波子返工……
嗰陣時請咗阿Mark返嚟兩三日左右，有一次咁啱一齊走，佢撳3樓，然後我仲戇居居同阿Mark講：「呢層停車場通唔到落去㗎喎，2樓先可以穿平台去隔籬大廈再出大街。」
阿Mark：「哦，我知，因為我揸咗車返嚟。」其實阿Mark得24歲，雖然24歲有車大有人在，但我當時真係冇諗過新請呢位人工得$18,500嘅小男孩會揸車返工，係我思路同眼光狹窄。
都未消化完就到3樓，行入停車場有架好生面口嘅波子，最重要係隻色好肉酸，我忍唔住講咗句：「痴線！咩人會鍾意呢啲色？去滾肯定畀老婆啲friend周到，因為離遠都認得，好心啲人低調啲啦！係要畀全世界知道揸靚車，咩心態？」
你見我講得呢句，有呢段鋪排，應該估到結局係咩啦……
阿Mark：「哈哈，我女朋友都係咁講，佢叫我溝女小心啲，呢架車係我嘅，我鍾意佢夠sharp！」
好在我架「錢七」泊得比較遠，如果泊正隔籬真係情何以堪，講多個秘密你知，當晚我喺自己架車上面搞呢搞路，等阿Mark開走架波子之後先敢開車，我唔係自卑……但若然之前冇講咩「好心啲人低調啲」呀，「唔明啲人咩心態」呀，咁就冇咁尷尬囉！
你以為淨係男下屬有錢呀？未講完呀！有個女下屬叫阿Lu，年頭個annual dinner因為可以叫埋屋企人去，我老婆話阿Lu個手袋好貴，咩要配貨先買到，又唔知點樣升晒值。
我話畀老婆聽，呢位叫阿Lu嘅女仔經常孭呢個袋返工，即係好似我孭GREGORY 背囊返工咁普通，跟住老婆上網搵畀我睇，What？呢個袋本身要4萬幾，但出面已經炒到……失覺失覺。
其實阿Lu係一個心地好好嘅女仔，有次我買錯咗張SD卡，send上我哋部門個WhatsApp group問有冇人啱，因為用咗$135蚊唔想得物無所用，百幾銀肉赤㗎嘛，咪順便喺個group求安慰囉！點知成班同事冇人啱用，阿Lu安慰我唔使肉赤，連隨send張唔知咩牌子嘅鞋相出嚟，佢話自己online買細咗一個碼著唔到，又太遲先開箱已經冇得退，阿Lu話同我same same喎……same same，佢對鞋5千幾喎，著完行得快啲？唔著就咁擺喺度封塵？咩人嚟㗎你哋？
最貼地係另一位已婚女同事Sharon，佢以前住蝴蝶邨，我就住富泰，大家都住屯門公屋，婚後佢耐唔耐會痴我車坐，原來搬咗，佢話富泰順路喎！
嗰次我仲問Sharon：「即係點呀？公屋轉公屋呀？有咩手續？你富泰邊座？睇下你同我近唔近先。」
Sharon：「唔係呀，我住富泰旁邊個聚康山莊，所以你迴旋處放低我得喇！」
我：「聚康好住咩？又入，又貴，富泰嘅地段，私樓嘅價錢，你老公又係屯門人呀？」
Sharon：「係啦！覺得以前蝴蝶邨近碼頭仲多嘢食，不過我冇得揀，層樓係老爺，結咗婚一定要搬過嚟！」
我：「哦，老人家係會想同後生住，冇咁悶可以傾下計吖嘛！」
Sharon：「唔係，老爺同奶奶都係住聚康山莊，但佢哋唔同單位，唔使一齊住㗎！」
我：「嘩，即係兩層樓都買聚康呀？又會咁鍾意嘅？」
Sharon：「三層，老爺話自己係住聚康先發跡喎，成日話自己大器晚成，話旺佢，最風光時買咗三層，一層自己住，兩層租畀人，而家我哋結婚，佢收返一層送畀我哋住，佢同奶奶另外住，得返一層放租。」
我唔想再聽，咩一層兩層三層，聽到都頭痛，Sharon同我出身差唔多，不過佢老公……應該係老爺好有錢，得喇得喇，知你哋叻喇！
老細都有問過我點解4個下屬都咁有錢（走咗Lawrence，暫時得返3個下屬），仲講笑問我係咪專請有錢人喎！梗係唔係啦，佢哋份CV最初係冇寫詳細地址，頭先都講咗，Sharon最初都係住蝴蝶邨，我點知個個都咁富貴啫，我係上司，但我最窮，真係同人唔同命。(完)