「你想自己辭職，定係我炒你？」之前因為同阿頭吵大鑊，方丈份人出名小器，佢遲早都會郁我㗎喇，只係估唔到仲有option可以揀。
我：「我唔會辭職，你炒我囉！」
「咁得啦，你自己講㗎！」
執定嘢等收信，過咗成日都冇動靜，臨放工佢再走嚟「恐嚇」我。
「你自己辭職吖！」
我：「點解呀？」
「唔好話我唔提你，你自己走，公司照正常出reference letter，大家好嚟好去，如果我炒你，封reference letter就會打住你被解僱，你第日搵工麻煩咋！」
我：「我無所謂呀！」
當我3歲小朋友？自己resign一蚊都冇，又要坐足成個月，你炒我就即刻走得，公司仲要賠代通知金，講到尾你都係想慳呢一筆啫！
結果佢當日冇炒我，等到第二日返工又同我講：「同老細傾咗，你自己遞信而家就走得！」
我：「唔使呀，你炒我吖！」
阿頭隨即抽起晒我嘅工作，所以之後兩日我係齋坐，佢轉玩冷暴力，weekend前又行埋嚟講：「你唔辭職盞自己無癮。」
我：「唔會呀，冇嘢做我仲開心。」
Happy Friday見佢激到紮紮跳嘅樣，我真係身心舒暢，放完假星期一返嚟，佢最終都係主動炒我，賠足一個月人工，即時走得，但直至而家都未收到reference letter，我估都唔會收到。
好在後來in咗份工並冇著眼我嘅離職原因，至於reference letter我就以當年入職嘅合約同埋前公司卡片代替，證明自己真係做過，啱啱收到電話confirm offer喇，所以我先有心情投稿。
當時嘅諗法係搵工被問起就照直講，如果對方冇特別問就輕輕帶過，即使時光倒流我都唔會resign益佢哋，你叫我主動辭職換一張正常嘅reference letter啫，但如果人哋要做reference check，你咪又係會煮死我，有分別咩？