有冇人同我一樣，有時收到WhatsApp會特登遲啲覆，唔係想扮大牌，只係好驚自己秒覆，對方又秒覆，咁就會沒完沒了傾落去，太攰喇！
對住朋友都係咁，公事方面就更加啦，我意思係辦公時間以外嘅msg，偏偏老細就好鍾意夜晚send msg去公司WhatsApp group，9點幾10點最多msg，唔知係咪佢食完飯冇嘢做，就算11點12點都試過，其實全部都唔急㗎，而且大部分msg都好廢，例如：「有冇見到公司停車場有架綠色跑車，好樣衰！」
呢啲無聊嘢嚟㗎！你想我點應？我冇揸車，返工放工都唔會行停車場嗰層，點答你啫！
咁當然有啲同事係好識做，例如講綠色跑車單嘢，明明唔知同埋冇興趣，班同事都會reply：「係？」「咁肉酸？」「聽日睇下先！」大家覆呢啲有咩意思呢？呢個公司group，又唔係朋友吹水group！
好多同事平時面對老細啲廢msg，就算冇嘢好講，都會覆返個emoji，但唔使下下咁傀儡呀？係咪要所有同事一人一個emoji點名報到咁呀？
老細有留意到我不嬲唔覆，你話幾恐怖，原來佢打完句嘢真係會「數人頭」，睇下邊啲同事冇回應，所以間中會畀說話我聽，直頭喺個group寸我，話我成日唔覆msg，幾點呀？放咗工返屋企陪老婆啦，同你傾一架我見唔到嘅綠色跑車咩！
但無論有冇發生上述嘅事，我都一早想轉工㗎喇，適逢之前搵到新job，咁我就順勢辭職啦，仲有兩三日last day，老細喺公司group又畀說話我聽，佢打咗段字：「你哋邊個係管理員呀，踢Dicky出去吖，佢都就走，平時又唔覆msg，搵人踢佢出group啦！」
我今次覆呀，秒覆添呀：「唔係冇時間覆，係冇精力覆，因為你係消耗大家精力嘅人。」
幾驚出唔切呀！個group靜晒（你哋唔係好鍾意覆emoji㗎咩
），幾個同事都私下msg我，問我做咩咁勇……過多陣我就畀人踢出個group喇！
老細可能唔明白辭職嘅人係最敢言呢個道理，好在我執得切個尾彩啫！