我做保安，之前轉咗去一間學校做，發現早更有個阿叔大約50幾歲，日日著西裝返嚟，開工嘅時候換保安制服，收工又著返老西，間唔中仲會拎公事包，真係有啲突兀，啲老師都冇佢著得咁正統。
公司有啲後生同事私下笑早更阿叔扮晒嘢，話佢以為著得斯文就可以搣甩浸保安味，又揶揄佢係咪拒絕向現實妥協，唔甘心做一個保安員，仲有人估佢想溝女教師。
大家平時只係笑，唔會問阿叔點解，咁我想了解下，所以趁有一日又熱又潮濕就問佢：「唔熱咩？T恤波鞋舒服啲喎！我直頭想放工即刻踢拖！」
阿叔：「熱呀！咪買把風扇仔囉，有乜辦法！」
我：「唔係呀，我講緊你收工套衫呀，出面好熱喎！」
阿叔：「我知你講便服，有乜辨法啫，屋企人唔知我做保安，你哋班友喺後面笑緊我吖嘛！」
我：「我冇呀……」
唔知阿叔信唔信我冇份笑，不過佢又真係幾大方唔計較，仲同我講原因。
原來阿叔以前做文職，3年前被裁員，唔敢同老婆講轉咗行做保安，佢話自己曾經好努力去搵，點知個個都嫌佢老。
「畀人炒咗之後嗰半年，我send出去嘅履歷起碼有百幾封，九成九冇回音，有幾份有得見，上去又畀人踩到地底泥咁，好在冇仔女，而家搵少咗都唔算好大壓力，所以我先返早更之嘛，阿頭又肯畀我放星期日，咪同老婆講而家公司要返6日囉！大時大節就搵人替更。」
我：「咁樣做人好辛苦喎！你應該老夫老妻啦，點解唔照直講呢？」
「老婆唔信㗎！一陣又問點解淨係炒我，又覺得我有經驗好多人爭，冇理由搵唔到工，有苦自己知啦，總之煩！」
其實兩公婆有乜可能呢啲嘢都要瞞？裁員冇人想，不過家家有本難唸的經，佢應該最清楚自己老婆嘅性格，只係一個大話講3年，可能仲有好多年，突然覺得自己單身都幾好。