呢個世界真係乜嘢人都有。
離職啱啱好一個月，舊老細忽然打畀我：「阿佩呀，你幫我覆返誼發個何生吖，佢話你之前跟開，想你跟埋美國水單嘢。」
我：「吓？點跟呀？我返緊新工……」
舊老細：「你聽我講埋先，何生話你知道佢裝櫃嘅要求，我唔知佢講乜呀，你應該知㗎啦，另外提下誼發要找埋條數先出得貨喎！20號前一定要找咗條數先。」
我：「唔方便跟喎……」
舊老細又打斷我：「你聽我講埋先，3713同7204兩隻model咪畀discount價佢哋嘅，11月之後唔得喇，你同佢講啲原料費加咗，要變返normal price，記得喎！」
我：「唔係呀……」
舊老細：「你聽我講埋先啦！記得問埋invoice係send去香港定廣州，聽講佢哋香港冇咗會計部，搬晒去廣州天河嗰邊。」
我：「好呀，我而家幫你搵何生吖！」
舊老細：「盡快喎！」
收線之後，我直接block咗舊老細電話，繼續做自己嘢，冇即時發火係因為新公司環境有少少靜，份新工返咗冇幾耐，費事畀新同事聽到我鬧人啦！
然後隔咗半個鐘，另一位舊同事WhatsApp我：「阿佩，老細話你唔聽佢電話喎，你搵咗何生未呀？」
有料呀你哋，block多一件！我離咗職㗎喇，係咁「你聽我講埋先、你聽我講埋先」，既然你無視我辭咗職，臨尾仲嗌我盡快，我咪求其應你囉！成班好似聽唔明人哋講嘢咁，癲少陣啦！