有個資深嘅阿姐本來已經離開咗公司三年幾，但係早兩個星期又見佢喺office出現，初時以為佢返嚟「探班」啦！點知唔係，原來佢係重新入職，搵人事部再交資料，當然唔需要interview啦！解釋清楚先，叫阿姐係因為佢年紀大約50尾60頭，唔係Manager嗰種阿姐，為咗方便稱呼，以下我叫佢做Mary姐。
其實我哋班同事就唔太鍾意Mary姐，首先佢以前不嬲都係行行企企，食飯兩味，完全唔知有咩貢獻，真係少佢一個唔少，咁都冇問題嘅，打份工啫，人哋出幾多力關我鬼事咩，最緊要係我自己準時出糧，偏偏Mary姐冇料又寸嘴，而且經常喺雞毛蒜皮嘅事方面搵其他同事麻煩。
人哋嘅是非我唔講喇，淨係講我點解麻麻地鍾意佢，有次pantry冇水，Mary姐拎住個杯企喺附近揭報紙，原來等緊人換，咁無所謂啦，佢年紀唔細，我又係男仔，咪我換囉，何況唔係舊式倒插嗰隻換水，只係揭開個蓋，喺水機下面插條管去新水樽度，簡單任務，你唔做咪我做囉，哈！我一換完，Mary姐就「噸」起個款話我。
「你換之前冇抹乾淨個樽蓋同四周圍喎，求其抹兩下就算呀？咁咪好唔衛生囉！」
我：「咁都叫求其？」
「梗係求其啦！」
咁啱呢個時候有其他人行入pantry，Mary姐即刻向其他同事投訴：「頭先Jacky換水冇抹乾淨呀！你哋話點飲吖！唔怪得有時啲水成陣怪味啦！」
好嘢好嘢！你已經齋睇唔換，人哋幫手換水仲要唔該都冇句，挑剔我抹得唔夠乾淨，再同其他人投訴我！唱我！而且你話有時覺得啲水有怪味，請問次次都係我換㗎？點解將所有嘢入晒我數？
反而係其他同事幫我，話唔覺啲水有怪味，又話個樽頸其實接觸唔到條插管，唔使抹得咁徹底，Mary姐見其他人幫我之後，即時露出一副嘴藐藐嘅表情，樣衰到呢！
佢咁乞人憎又點會淨係「搞」我一個吖，唔少同事都吃過佢嘅「苦頭」，所以三年幾前Mary姐話要提早退休，大家都心裡暗爽，私底下直情話要開香檳，邊估到今時今日佢重出江湖，唉！我笑唔出呀！
聽我大佬（Line Manager）講，呢條煩膠Mary姐之前日日打嚟office搵老細，用「開國功臣」呢樣嘢求老細請返佢，我大佬話「開國」勉強有Mary姐份，但「功臣」就絕對稱唔上，anyway，老細最後請返Mary姐，念在彼此有多年賓主關係喎！
現今商業社會打感情牌竟然work，咁我都明白嘅，Mary姐對老細嘅態度又點同對住我哋吖，老細念舊所以就畀佢回歸。
最正係有個同事問Mary姐點解會「復出」，我都想知呀！但之前同Mary姐冇兩句，由我發問會好奇怪，有同事做醜人就最好啦！
Mary姐話佢畀人呃咗過百萬，連層樓都按埋，佢三年前提早退休之後，join咗個唔知咩微信投資group，詳細點投資佢就冇講，總之跟人買股票買期指，要補倉嗰啲（我唔熟呢瓣），然後全部積蓄冇晒，Mary姐仲話佢報咗《東張西望》，但冇人覆……
我以為東張人人都覆。
正當我疑惑緊點解Mary姐有百萬身家之際，佢已經講埋下半part，原來Mary姐老公為咗幫佢，同樣拎晒啲棺材本出嚟幫手還債。
咁Mary姐都算幾好彩，據講佢老公都退咗休，而家一樣再重新投入職場，由以前做文職轉咗去做保安，因為中咗個微信投資騙局之後，仲有好多債直到而家都未還晒。
Mary姐真係執到，有老公幫手，不過知道佢兩公婆半生血汗錢冇晒，我絕對冇任何心涼感覺，一件事還一件事，Mary姐幾衰都好，咁樣畀人呃錢係慘嘅。
好多同事圍埋聽佢分享，當中有人安慰Mary姐：「算啦！錢冇咗可以再搵過，以後小心啲喇，唔熟嘅嘢唔好玩，投資始終好大風險，你老公好好吖，佢冇份玩，但都肯幫你，而家仲走去做保安，好難得㗎！」
高潮嚟喇！Mary姐聽到有人讚佢老公即刻跳掣：「我老公好？就係因為佢冇用，我先至要學投資咋！」
換轉係你聽到佢咁講，試問可以點接落去吖？不過唔使接，Mary姐一輪嘴繼續唱衰佢老公：「如果佢搵得多錢，我就唔使跟人投資啦！我輸咁多錢都係佢累我㗎！佢有本事就幫我還晒，仲使我退咗休再出嚟做？」
有時睇《東張西望》會唔明，點解啲騙局舊酒新瓶都有人keep住上當？點解畀人呃都唔識反省？成日覺得呢啲係戲劇效果，原來唔係㗎！現實中真係好多呢種人。
唔係黑心，可憐之人果然係有可恨之處，我戥Mary姐老公慘啫！