人生第一份full time，而家做咗幾個月，一直有個疑問喺心裡面，因為我驚自己嘅朋友圈子太窄，反映唔到事實真相，所以想投稿問問大家。
返咗呢份工一個月嘅時候，某日做做下嘢，老細喺公司WhatsApp group send咗個msg出嚟：「各位，出咗糧喇，繼續努力
」
原來出糧會有老細提示㗎？但我未嚟得切思考，個WhatsApp group已經有10幾個msg好似接龍咁彈出嚟……
A同事：多謝老闆！
B同事：Thank you
C同事：Yeah～～多謝，我會加油！
連續十幾個msg回覆老細，不能盡錄，全部講多謝，其實大家都有付出，成件事等價交換，雖然say個thank you係禮貌，但出糧嗰日要同老細講多謝㗎？
正當我好迷惘嗰陣，阿姐喺佢個位嗌埋嚟：「Christy，爭你喎！你未同老闆講多謝呀！」
作為新人，我唯有答阿姐：「哦！」然後喺個group覆返句：多謝！
近幾個月出糧我都有一齊「接龍」，喺個group同老細講多謝，講遲啲都唔掂，因為阿姐會好緊張咁提我。
問過身邊幾個朋友，佢哋話自己份工唔會咁，其實有冇人出糧之後都要同老細講多謝㗎？呢啲就係人情世故？