有個親戚年頭嗰陣叫我幫佢個仔整張reference letter……
「你做人力資源㗎嘛，睇下可唔可以幫表哥開工作證明吖！」
我：「開咩工作證明？證明啲咩？」
「證明佢喺你公司做過囉！」
我：「表哥都冇喺我公司做過！」
「就係囉，你開一張畀佢，方便佢搵工，『安』一個高少少嘅職位。」
我：「哦，即係偽造。」
「唔係偽造，出封信舉手之勞啫，你嗰間大公司，佢拎出去吃香啲㗎！」
我：「咁咪即係偽造囉！你想我冇咗份工呀？」
「你出封信又唔使驚動到老闆，印出嚟之嘛！」
我：「咁你自己落樓下印都得啦！」
「你明唔明呀？想有你公司標誌同埋印章呀！」
最終梗係冇幫佢啦！親戚發神經都算，最嬲係我阿媽隔一排之後做說客：「你做咩唔幫表哥搞工作證明呀，大舅父好嬲呀！幫到咪幫囉！」
我同阿媽講：「偽造文書監都有得坐喎，你係咪想我冇得撈吖？我坐監唔緊要呀，畀人炒咗冇得畀家用你咋，係咪整吖？」
阿媽：「有冇咁嚴重呀？」
可能真係驚我冇得畀家用，之後阿媽冇再煩喇，不過嚟緊12月婆婆大壽，阿媽就忽然同我講：「大舅父佢哋一家唔去喎，你之前又唔幫表哥搞封信，大舅父仲嬲緊呀，佢話你講嘢好難聽，我幾唔好意思呀！」
我：「婆婆大壽都唔去，年頭嘅事嬲到年尾，有冇咁小器呀？表哥搵到工就得啦！幾廿歲都唔化！」
阿媽：「你表哥就係未搵到工，所以大舅父仲嬲緊你。」
你嬲到幾時我控制唔到，但係表哥成年都未搵到工我就放心喇！