我見咗份咩工？經求職網站個系統send CV，唔使20分鐘已經收到電話嗌我去interview，個HR應該係冇其他嘢做，全程「捕」住個system同email，加上對方打嚟講完名就好快入正題：「晏晝有冇時間？想約你2:30見工。」我話ok之後，HR再三叮囑我唔好遲到。
我早咗5分鐘上到去，receptionist前面有兩張梳化，但加埋4個位已被坐滿，另外仲有幾個人企咗喺度，我話嚟interview，receptionist叫我等等就得，冇畀form我填，隔多兩分鐘左右，又有個人上嚟話約咗見工，聽到receptionist打內線同唔知邊個講：「齊人！」然後就帶咗我哋成班入房。
間房係一間好大嘅會議室，我數過，total有10個人，包括我，全部都係求職者，receptionist叫大家平排坐好，10個人喎，張枱雖然大啫，都要分兩邊坐到轉晒彎。
求職者之間因為互相唔認識，大家純粹眼神交接一下，冇傾計冇打招呼，而且好快又有兩個自稱HR嘅女人行入嚟，一個好後生，我估得20幾歲，妹妹仔咁，另一個就有啲年紀，好強勢，我估係阿姐之類啦！
妹妹仔HR：「好，多謝大家抽時間嚟見工先，個個都好準時喎！」
冇人有反應，下一句就輪到個阿姐講嘢：「今日係group interview，希望各位努力！」
其實我幾憎group interview，如果佢早講，我未必會趕頭趕命過嚟in，但係唔嚟都嚟咗，點都要見埋落去啦！
妹妹仔HR：「好，大家睇睇個投影器先，啲字清楚吖嘛？」
投影器大螢幕其實有少濛，濛到我懷疑自己睇錯嘢同去錯地方……
妹妹仔HR：「第一題，第一個登錄月球嘅人係邊個？A) John Kennedy B) Michael Collins C) Neil Armstrong D) Sunita Williams 」
成班求職者呆L晒，呢題你示範咋係咪？點知個阿姐開聲：「大家答得㗎喇！」嘩屌，嚟真㗎喎！
有條友叻唔切真係搶答：「答案係C) Neil Armstrong！」
阿姐：「等等先，我逐個問，有冇人揀A？A係John Kennedy？冇係咪？B呢？有冇人揀B？都冇人揀B，咁C呢？」
然後有8個人一齊舉手，包括頭先搶答條友，頂你個肺完全唔知呢個interview咩事，我都舉手先，然後淨返一個女仔都最遲揀埋C，阿姐就再問大家一次：「全部人都揀C？咁易答？最後答案，C係咪最後答案？」
仆街吖！仲唔係玩緊百萬富翁，個鏡頭收埋喺邊？
妹妹仔HR：「恭喜你哋，全部過關，下一題係問金田一青梅竹馬嘅女朋友？《金田一少年事件簿》嗰個金田一呀！」
喂！唔好玩啦！我見緊咩工呀？上一條問題先問緊上月球，我以為間公司做航天科技，下一條就問金田一，仲要強調《金田一少年事件簿》嗰個金田一，係咪有其他更出名嘅金田一呀？呢間嘢本業係屬於Beauty Care咋喎！發生緊咩事呀？
阿姐：「A） 永野芽郁 B） 七瀨美雪C） 神田菜都D） 金井永都，而家開始喇！」DKLM忍笑真係好辛苦呀，永野芽郁都夠膽死擺入去啲答案度。
我唔浪費時間描述過程喇，因為我識，我有睇開，同埋當時嘅諗法係，答錯一條咁無聊嘅問題，你真係會叫個求職者走？
Sorry，我太睇小佢哋，有4個人答錯金田一個女朋友，真係即刻要走，其中一個就係答永野芽郁，我想笑又唔敢。
10個得返6個，被淘汰嗰4個都呆若目雞，莫講話佢哋啦，我晉咗級都呆晒呀……點解我會用晉級呢個詞語……真係搞到人都癲，又要講多次，我究竟見緊咩工呀？
再下一條問題係圖片，嚴格嚟講係國旗，阿姐問：「呢一面係邊個國家嘅國旗A） 危地馬拉 B） 菲律賓C） 巴拉圭D） 捷克，而家開始！」
我唔係有心晉級㗎，不過由細到大睇開足球，國旗你難我唔到，可惜難倒其中3位求職者，唔知點解佢哋有人揀菲律賓同巴拉圭，其實支國旗係捷克。
如是者，再淘汰3位，得返最後3位，包括我。
呢個時候，嗰個阿姐忽然同我哋講經：「知唔知點解我一直冇叫你哋填form呀？其實你哋啲CV我都係快睇，因為根本唔重要，知識、基本常識、智慧，仲有反應先至係最重要，而家得返最後3位喇，嚟緊就唔係選擇題，係搶答題，我會計分嘅，快得嚟仲要準確，如果過到關我哋就會準備好offer㗎喇，加油！」
去到呢個階段，我都唔知再畀咩反應喇，你問啦！
真係估佢唔到，緊接呢條搶答題竟然係……
阿姐：「我哋老細叫咩名？」
痴線！你老細明星呀？不過你唔好理，其中一位求職者竟然答到：「中文名我唔記得，英文名係咪叫Vivian？」
阿姐：「冇錯！果然有做功課！」讚完嗰位答中嘅求職者之後，阿姐講咗一次老細個中文名，叫我哋要記住，佢仲話呢部分搶答題唔係即時死亡，大家仲可以鬥快答埋餘下兩條。
下！你哋interview搞到好似百萬富翁咁，唔知以為個老闆係陳啟泰，定係陳啟泰原來有個女性英文名叫Vivian？
妹妹仔HR：「我哋公司幾多年成立？」
笑咗！返學真係冇教，不過頭先講到老細英文名嗰位求職者又答到：「我記得好似係2000年，因為我睇過你哋公司網站，我細佬都係2000年出世，所以有啲印象。」唔乸係呀？2000你都答到？
阿姐：「正確應該係2001，因為網站都有寫，2000係策劃，未正式成立，2001先正式，不過你答到咁近已經好唔錯，好喇，即係你哋3位當中，得一個人有睇公司網站啲資訊，咁再問落去都冇意思，另外兩位要淘汰喇。」
我真係呆住嚟，呆住走，唔肯定唯一嘅「生還者」係咪真係拎到offer，但係已經唔重要喇，我冇興趣做呀，加上見工前做功課好正常，但係師兄你背埋老細個名同幾多年成立？我好擔心你喎！呢份工注定係屬於你㗎喇，點好意思同你爭呀？
我究竟見咗份咩工？係咪年尾啲工特別痴線？(完）