Headhunt安排我上去一間公司見工，三個人一齊in我，包括HR、Department Head，同埋佢哋老細，除咗開頭自我介紹之外，之後呢三個人就連珠炮發問咗我一堆問題，全部同份工冇關。
我：「吓！有呀！」當時以為佢想表達好多OT，有機會影響我私人生活，不過再問落去就發覺唔係咁簡單。
老細：「拍咗幾耐？」
我：「幾年啦……」呢度係相睇公司？
Department Head：「幾年都好穩定喇喎，有冇同男朋友傾過幾時結婚呀？」
我：「冇喎！」有都唔會同你講啦！你邊位呀？
HR：「咁結咗婚之後有冇打算生小朋友？」
我：「暫時唔知喎！」愈嚟愈唔對路。
老細：「不如我用pecentage嚟問吖，你覺得自己有幾多成機會喺兩年內結婚？」
我：「我唔知！」
HR：「假設啫，你照直答得㗎喇，我假設你呢一兩年內真係結婚，大唔大機會生小朋友呢？」
今次未等我答，又輪到Department Head插嘴：「我換個方式問啦，你同你男朋友鍾唔鍾意細路？」
由於已經冇興趣in落去，我都唔客氣喇：「答唔到你哋喎！我直接啲，你哋咁在意人哋幾時生BB，直接請個結紮咗嘅人啦！呢份工唔啱我！」
跟住我就起身走，擰轉頭行出會議室嗰陣，我聽到佢哋壓低把聲講：「呢兩日in嘅人冇個正常。」
我費事爭吵啦，始終我一個女仔，呢度又係人哋嘅地頭，而且佢有我份resume，再嘈盞嘥時間！
後來我打返畀個Headhunt投訴，佢猛咁同我講唔好意思，又解釋呢個position上一手員工做咗冇幾耐就大肚，原來見工嗰陣已經有咗，間公司覺得蝕咗產假，仲要搵個臨時工返嚟頂替，所以好怕再請到「潛在大肚婆」。
咁我又冇怪個headhunt嘅，講真吖，啲公司冇返咁上下kam，根本就唔需要搵獵頭幫手請人，唔通真係錢太多想畀啲commission你賺咩！而且諗起當日聽到嗰句「呢兩日in嘅人冇個正常。」咁我就放心喇，因為我知其他求職者應該都係差唔多反應。