個幾月前見咗份工，遇到個HR好經典。
Interview中段個HR問我點解上一份工冇reference letter，我答佢：「因為我走咗一個星期，舊公司個HR又辭咗職走埋，佢哋出唔切比我，已經追緊。」
HR：「即係你舊公司而家冇HR？」
我：「好似話未請到，其實我都可以叫前上司出住畀我先嘅，如果你需要，我試下問問佢。」
HR：「唔係唔係，reference letter唔急，你可唔可以問下你舊公司請到HR未？或者問下你前上司，介紹我入去吖！」
我真係嚇親，完全唔知點算，立場逆轉呀？我嚟見工，你叫我介紹工？當下唯有本能答返佢：「吓……但我前上司唔係人事部㗎喎！」
HR：「我知，咁佢都見到人事部請咗人未㗎嘛，如果仲未有新嘅HR返工即係未請到啦，幫手引薦下吖，我搵緊工呀，Please～～～」
佢個Please仲要拉長發音，冇諗過去見工會調返轉畀人“R“介紹工作，完全冇心理準備個interview會發展到呢一步，咁我當時就敷衍話會問問，點知個HR第二日打返畀我，初初以為有offer，原來佢係問我有冇向前上司介紹……
我：「我冇搵前上司喎！」
HR：「噚日你走咗之後我上求職網，search到你舊公司真係仲請緊HR，你幫我問問啦！」
我：「咁仲簡單啦！你自己send CV去咪得囉！」
HR：「有人介紹始終好啲吖嘛！」
我：「咁我又想問問我份工呢？係咪有進展？」
HR：「未呀！我pass咗畀個Department Head㗎喇，而家係佢揀緊。」
哦！你搵工就急住要我介紹，我份工就冇進展，其實我未嚟interview之前都唔識你，憑咩介紹你畀我舊公司呢？但當時我真心覺得呢份工係有機，所以講嘢唔想咁絕。
後來我自己見成咗另一份工，點知呢個HR仲打畀我：「喂！我自己send咗CV去喇，點解冇回音嘅？知唔知你舊公司HR走咗之後，係咪仲有其他HR同事負責招聘？可唔可以畀個名我呀？或者幫手叫佢哋睇下我份CV吖！」
我：「我唔做呢啲雞仔媒人，你想入去做就自己諗辦法啦！我幫唔到你！」
本身都唔得閒再講返呢件事，但今朝我竟然收到呢位HR嘅WhatsApp，係呀，佢add埋我電話，今次用WhatsApp搵我，佢個msg係咁寫：「你好呀，仲記唔記得我呀，xxx嘅Mandy，之前Send咗CV去你舊公司一直冇回音，不過我見佢哋仲出緊job ad請HR，可唔可以幫我了解下你舊公司請人嘅情況呀？」
其實我想鬧佢㗎，但費事沒完沒了，我又已經返緊新工，block咗呢個HR就算，我真係覺得佢好經典！