遇到個好纏擾嘅求職者，大約3個星期之前，我收到CV然後叫咗個34歲嘅女士上嚟見工，其實喺interview開始時一切正常，都係自我介紹，同埋我問佢答，同一般嘅見工過程冇乜大分別，但係去到後段就失晒控，我投稿嘅呢一刻都仲畀佢煩緊。
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
「你結婚未呀？」係咪以為呢條問題出自我口呢？唔係呀，係個求職者問返我轉頭，咁我又冇乜所謂嘅，而且大家都係女性，加上唔希望好寸咁回應「關你咩事」，所以我亦照直同佢講未結婚。
「咁你第日結婚影婚紗相，真係要考慮下克羅地亞，我同老公去咗嗰度影，嘩！靚到呢！」
我：「哦，係呀？克羅地亞影婚紗相都幾冷門喎！」
「好過喺香港影多多聲，我畀你睇下。」
語畢，呢位求職者拎部手提電話出嚟，打開裡面嘅相簿，如數家珍咁樣同我分享。
禮貌上我都有睇，同時讚影得幾靚，跟住佢就收返個電話繼續講去克羅地亞影婚紗相用咗幾多錢，當地有咩名勝古跡值得去，坦白講我冇興趣知，始終都係一個interview嘅場合，都係做返適當嘅嘢好啲。
我：「好，我哋講返份工，你仲有冇嘢想問？」
「冇喇，你頭先都講得好清楚，不如我講多樣嘢畀你知吖，我上星期去咗紋身，畀你睇下。」
我以為佢係講緊手臂手指或者後頸有紋身，我唔介意，亦唔想睇，隨即已經講咗：「唔使畀我睇啦。」
點知眼前呢位求職者居然拉高件衫！！！！！！！
我：「你做咩呀？」
「畀你睇下我個紋身囉！」
就算我講咗唔使，佢仍然將件衫扯到見到3分1個胸圍先停，原來個紋身喺左手邊胸部下面……
我：「你拉返件衫落嚟先啦！」
「怕咩吖！大家都係女人，我都未驚，話時話，你呢間房唔會有cctv㗎呵，哈哈，我都唔記得咗添！」
就算冇cctv，就算大家都係女人，你都冇理由咁樣扯高件衫畀個波邊我睇呀？
嗱嗱聲叫佢返屋企等消息，佢做嘅嘢太唔恰當喇，而且論interview表現同其他各方面，我之前in過一個更好，之後亦陸續有人上嚟in，基本上我已經確定自己唔會揀佢。
但係之後嗰幾個星期，呢位求職者都係keep住大約兩日打一次電話嚟，因為我email約佢見工時畀地址，email個footer有我個名同直線，我已經多次喺電話裡面講公司未決定人選，不過呢位求職者就明言唔介意，打嚟唔單止講見工嘅事，又話大家可以傾下其他嘢。
「我前晚同老公食咗間懷石料理，唔係好貴咋喎，我email send咗條link畀你，你同你男朋友去試下吖！其實你手提幾多號啫，下下打嚟office又驚阻住你做嘢，噚日我打過㗎，你同事話你行開咗，加你WhatsApp吖，方便啲吖嘛，再唔係你add我又得，你有我手提啦！」
佢呢幾個星期真係不斷打嚟講埋啲無謂嘢，就連online買咗衫、樓下超市廁紙減價、七仔有新嘢換、幾時開始計劃去旅行睇紅葉、睇咗邊套劇覺得好正……全部都走嚟同我分享，而其實我每次都係匆匆收線。
最後我忍唔住同佢講：「個position請咗人喇，唔好意思呀，希望你快啲搵到其他工作。」
「哦，唔緊要，都估到㗎喇，係咪一早請咗㗎喇，唔好意思開口所以而家先講？冇咩所謂啦，我又唔係等呢份工開飯，喂！我有coupon可以去K11 hightea喎！你星期六得唔得閒？我老公唔啱呢啲，我同你兩個去啦！」
我：「唔使客氣喇，你同你啲朋友去啦！」
「你咪我朋友囉！係喎，次次都係我講自己啲嘢，不如你講下你啲嘢吖，你幾多歲呀？我估下先，32？」
我：「其實我哋唔係朋友……大家只係見工關係，係HR同求職者關係。」
「你唔好咁死板啦，見唔成份工都可以做friend㗎啫！我都唔介意。」
我介意呀！截至我投稿之前，依然收到呢位求職者電話，從未試過遇到咁嘅情況㗎！（完）
18歲即刻去紋身 不幸的人用一生治癒童年
https://youtu.be/rRqnA-OiwFA