今日見咗個求職者，因為未正式錄用之前，我哋係唔會影印對方任何文件，所以interview嗰陣循例對一對身份證、學歷、工作證明，真係未試過喺呢一部分已經「kick」住，學校名同公司都係同resume一樣呀，但個人名完全係另一個人喎！咩事呀師兄？係咪大家有咩誤會？
「咦！唔同名嘅……」其實最初我係覺得自己撈亂咗啲resume約錯咗人，所以呢句係我interview對資料時自言自語，點知眼前嗰位求職者忽然笑晒口同我講：「哦，係呀，呢個先係我，send嚟嗰份CV我特登打另一個名㗎！你唔使理，呢個先至係我嘅真名。」
嗱！不如我解釋下先，由於要保障個求職者私隱，所以我化一化佢個名－－－如果你真名係叫李世民，份resume打李世昌，我尚且可以理解（其實都唔得㗎喇），而呢位求職者過份到點呢？大約係佢叫李世民，而resume佢打自己個名叫張國強……冇錯，佢連個姓都改埋。
我：「點解要咁做呢？」
求職者：「唔方便畀真名。」
非常唔好意思，我知道咁樣唔專業，但我衝口而出問咗句：「你殺過人？」
求職者繼續保持微笑：「唔係唔係，驚舊公司知道我轉去competitor呀！」
我：「唔明，你resume都有打舊公司名㗎，點樣驚佢哋知你轉去competitor？」
求職者：「咁你知香港幾細，呢行又幾窄啦！我唔知你呢度有冇我舊公司啲耳目㗎嘛，一陣有個識得行家，又或者之前喺我舊公司做過，傳下傳下就去到耳邊㗎喇，所以見工前我都係小心啲，保護返自己個身份先。」
我：「Er……但你都識得講呢行窄，個個都轉嚟轉去啦，好平常啫！我哋賣醫療用品，唔通請個賣書賣衫嘅人咩……」
求職者：「仲有4個月先過完冷河，我舊公司真係會告㗎！」
原來呢位求職者嘅舊公司合約附帶過冷河條款，總之離職後半年唔可以過檔同行任何一間公司。其實唔少行業轉工都要過冷河，我老公做銀行都有，有啲係大你，有啲係認真，有啲就算冇呢項條款都會口頭唔准你轉去同業，所以我明白呢位求職者嘅顧慮，只係明白還明白，用個假名寫resume見工就……
假設求職者真係顧慮有人報寸，就算send完resume就通天，咁你咪唔好填中文名落去先囉，求其叫自己做Simon Lee, Edward Lee, Peter Lee都冇人理你，有必要連個姓氏都作假咩？如果要報寸，見到你舊公司個名都估到一半啦！真係有啲多此一舉。
我：「得啦，明白㗎喇，我哋做咗interview先，呢啲問題我交畀個department head之後同你傾。」
求職者：「唔係呀，有啲嘢我都想傾埋先，之後請咗我呢，email同埋卡片可唔可以用藝名？」
我：「藝名嘅意思係？」
求職者：「因為我要出去派片（見客），都好容易畀人知，email又係，一掟出街個個知道我真名就唔得掂。」
我：「咁你想用咩藝名……」
求職者：「冇所謂㗎，藝名用劉德華又得，黎明又得，梁朝偉都得㗎，英文名Andy Leon都冇問題。」
唔好玩啦師兄，你令我好難做喎！
完成咗個interview就去同個department head講，睇下佢會唔會即刻見埋，不過department head拒絕，佢話如果唔用真名搵工同埋印卡片，咁唔用真名出糧得唔得？始終有好多合約問題要顧慮，其實對雙方嚟講都冇保障。
Department head亦請示咗老細，老細話呢位求職者有啲藏頭露尾，假設佢驚畀舊同事知道，咁其實去見客都會曝露身份，到時如果個客知佢係劉德華，張卡片又印住梁朝偉，人哋都會覺得我哋公司古靈精怪唔知搞乜鬼，形象會變得好業餘。
嗱！幫到你盡㗎喇師兄，藝名見工印卡片真係唔得哩，如果佢見到呢個post，麻煩都自己諗諗點解決啦！(完）