真係好怕group interview，之前見咗份工被安排同另一位男性求職者一齊in，對方就派出一個HR同兩個經理，唔算大嘅會議室裡面總共坐咗5個人，我覺得好侷促好尷尬，但可能間公司想慳時間之餘，亦想考驗下candidate喺咁多人面前係咪表現自如啦！
不過重點唔係interview模式，而係in到一半嗰陣，其中一位經理問咗條問題：「我想你兩個分別答我，如果將一支針掉落大海，你哋有咩方法可以撈返出嚟？」
正當我開始苦惱點答，隔籬個男仔忽然企起身：「見工已經辛苦，仲要答埋你呢啲無聊嘢，入到嚟都唔慌好做，我唔見喇，你哋幾個慢慢玩。」
佢冇大大聲，亦都冇講粗口，反而係用一種好攰好厭世嘅語氣講出嚟，離開會議室嘅時候頭也不回，嘩！會唔會型得滯呀？
包括我，在場每一位都呆晒，個男仔走咗之後，HR同兩個經理就開始傾：
「咁冇禮貌都有嘅！」
「係囉！咩人嚟㗎！」
「呢啲人請咗仲得掂嘅！」
我冇參與佢哋對話，最好笑係冇再問點樣喺個海撈返支針上嚟，究竟係唔記得咗吖？定係佢哋都覺得呢個問題無聊呢？
最終in多10分鐘左右就完結，相隔兩日，個HR打嚟叫我返工，無奈已經有另一間公司出咗offer畀我，可惜可惜，冇得求證係咪「入到嚟都唔慌好做」，不過真心嘅，我覺得當日嗰位interview嘅競爭對手好型，聽得出佢應該見工見到心很累，希望個男仔搵工都順利啦！