大大話話都做咗11年HR，第一次遇到咁樣嘅candidate，入到房開始interview，個後生仔拎咗部iPhone出嚟擺喺枱面，直接喺我面前撳錄音，個mon仲要向上，即係我睇住佢iPhone畫面開始計時錄音。
我：「點解咁做呢？我指錄音。」
唔係用寸寸貢或者責怪嘅態度問佢，只係普通語氣，因為我都唔相信自己見到嘅嘢，有啲驚魂未定。
Candidate：「保障自己囉！咁你講過咩都可以聽返吖嘛！」
我：「你見其他工都係咁？」
Candidate：「唔止見工係咁，我平時只要有關公事嘅嘢，好似喺舊公司入房同上司傾嘢，我都一樣照開錄音，有咩咪拎返出嚟聽囉！冇一條法例係唔畀interview錄音㗎嘛？唔係唔得呀？」
呢個candidate似乎滿身帶刺，其實喺英文方面嚟講，interview除咗可以解見工面試，仲可以解做訪問，例如記者同明星做訪問都係interview，當時畀佢咁樣錄音真係覺得自己做緊人訪。
本身想問下佢係咪曾經有不愉快經歷，所以先至有呢個習慣，不過見佢咁有敵意，都係算喇！
佢又唔係錯，冇法例話interview唔可以錄音！但呢下舉動真係嚇親我，即使你要保障自己，都可以選擇收喺衫袋或者褲袋，唔使直接擺喺枱面錄咁挑釁啩！而且禮貌上係咪要問下先錄呢？
Interview完成咗，我冇揀到佢，除咗錄音問題之外，咁又真係有其他candidate比佢更優勝。
如果佢繼續咁樣去見工，相信都冇咩人會接受到。