成日見啲人分享見工經歷講到好勞氣，其實唔使㗎，你當對方傻仔咁玩就得㗎喇！
新年前去interview，嗰位男HR望住我份CV，好似發現新大陸咁問：「原來你之前25,000呀？我哋未必畀到咁多喎！」
呢樣嘢真係令人好反感，我send CV嚟已經寫得清清楚楚，list晒之前兩份工嘅last salary，寫埋expected salary，你咁都睇唔到？個價唔啱仲嗌我上嚟？即係浪費大家時間啫！
我選擇唔勞氣，反而用好誇張嘅表情同聲線回應佢：「哎呀！係呀？咁點算呀？」
男HR：「我會盡力同公司爭取，睇下可唔可以畀到一樣，如果唔得呢，就可能試用期之後先加返。」
佢答得好認真！先生，我唔係要同以前一樣，一樣我轉工嚟做咩？你係咪睇唔到我expected salary填28,000？我last salary先係25,000喎！
我：「嘩！好喎好喎！點係呀！多謝晒你先！」
Interview去到尾聲佢又問我：「你食唔食煙？不過女仔好少食煙㗎呵？」
我：「食！好鍾意食！我凱婷嚟㗎！紅牛加煙，法力無邊，你未聽過咩？」其實我唔食煙。
男HR：「未聽過喎！其實我以前都食㗎，後來戒咗，老細唔係好鍾意同事煙break，所以之後如果請咗你，咁你就lunch先食啦！你中文名叫凱婷？」
凱婷都唔識？係咪香港人嚟㗎你？人工畀唔到又叫我上嚟in，仲咁多要求？
我：「直頭學你咁戒埋啦，對身體好呀！」
嗰位男HR似乎意識到我玩嘢：「你……好似有啲浮誇喎！」
我：「唔浮誇，戒煙好事嚟，多謝公司幫我改善健康添呀！」
心諗玩嘢玩到咁，你都feel到我唔想做啦，點知初四收到嗰位HR電話，佢叫我下星期返工……
原來唔係個個都識分曲定直，同埋我估冇乜人見佢份工。不過今次唔玩喇，同佢講我有其他offer就算，希望佢睇清楚啲CV先再約人上去啦！你啲時間唔寶貴啫，我哋求職者唔同呀，搭車嚟interview都要成本㗎！