幾年前經headhunt介紹工作，第一round面試係用zoom interview，算順利。當時整個社會仲係受到疫情影響，我老婆間公司直頭玩減薪，不過我仲慘，失業8個月，嗰陣嘅大環境已經冇乜工可以揀，所以有得interview我係非常珍惜，何況first in咁順，我堅信差一步就可以拎到offer㗎喇！
Second in佢哋要face to face，咁headhunt嗰邊就幫我約時間啦，我亦提早咗出門，無奈意外嘅嘢冇得預備，我去緊second in嘅時候遇到撞車，唔係我架巴士撞，係前面其他車炒埋一碟，我人冇事，但架巴士就塞咗喺公路郁都唔郁，嗰個位又落唔到車，除咗齋等根本冇其他選擇。
即使過咗咁耐，我仍然記得嗰份等待嘅煎熬，始終我去緊見工，而家講返梗係知發生咩交通意外啦，但當時喺巴士裡面我係唔知前面要搞幾耐，一開始又唔想同headhunt講會遲到，因為如果現場好快搞掂，其實我嘅時間仲係鬆動嘅，咁就無謂節外生枝啦！
等下等下5分鐘，等下等下又10分鐘，睇嚟預早咗都係趕唔切喇，眼見距離interview時間仲有40分鐘嘅時候，我決定打畀headhunt講出情況，希望佢同嗰間公司講聲，可能改晏啲會比較穩陣。
個headhunt其實好好人，佢即刻幫忙聯絡嗰間公司，只係隔咗陣佢就打返嚟同我講：「唔好意思呀，唔使去見喇！」
初初以為直接改日期時間，點知headhunt吞吞吐吐，咁以我同佢嘅關係（candidate同headhunter）應該可以直接啲嘅，所以我就問佢：「間公司嬲我遲到呀？Sorry呀！真係好黑仔，可能最後唔使遲都未定㗎！我費事last minute先同你講啫！而家係咪重新約第二日？」
Headhunt：「唔係，意外嘅嘢你都控制唔到，唔關你事，佢哋唔信你遇到交通意外，直接cancel咗個interview……」
我唔知點解當時自己咁樣提出：「我冇吹水㗎！直接影張相畀你睇吖，但我個視線睇唔到咩事，係巴士司機好大聲話前面有人炒車，我影張喺路中間塞車嘅相畀你證明吖！」
係咪人窮志短呢？換轉以前我真係睬你都傻啦！唔信咪唔信囉！未正式聘請就用懷疑我嘅態度，做咗你員工都唔慌有好日子過啦……不過我失業咗8個月喇，疫情期間又的確好難搵工，我發覺自己嘅志氣都冇晒，見工見到主動提出影相以示清白，可想而知嗰陣係幾咁艱難。
Headhunt：「咁又唔使，佢哋啲態度同語氣都幾決絕，我估就算你影相都冇用，佢哋覺得你遲到講緊大話。」
當日傻更更嘅我仲死纏爛打，想headhunt幫忙叫個客搵下新聞，甚至開個app睇下實時交通情況，因為真有其事你一定會check到㗎嘛！
點都好啦！後來份工真係冇咗，間公司冇畀機會我去second in，咁我都要搵食㗎，咪搏命再周圍send CV囉！印象中過多兩個禮拜左右啦，我終於靠自己搵到另一份新工，講真個offer係headhunt最初介紹嗰間好啲嘅，但嗰個時勢再加埋自己失業8個月嘅身世，有工請我就梗係返啦，仲揀咩！
如是者我就返自己搵嗰份新工，過埋試用期，然後個headhunt忽然call我：「喂！你搵到工未呀？」
我：「搵到啦，如果而家都未搵到就真係餓死，點呀？有其他好工介紹畀我呀？」
Headhunt：「就係之前嗰份之嘛！」
我：「咩呀？你又話佢嗰時覺得我講大話，遲到扮撞車，唔會再見我嘅！」
Headhunt：「本來係，佢後來仲請到人添，不過新人返咗個零月就辭職，然後佢哋經我再搵多幾個人去見，全部都唔啱，而家主動提起你，想你再去second in呀，我估你肯去就一定請㗎喇！」
我都好老實同佢講：「唔喇！而家份新工都唔錯，雖然offer似乎你呢個客好啲，但我新公司嘅氣氛好好，同事又幾夾，何況當日佢哋覺得我講大話，再去interview咪盞尷尬，多一事不如少一事啦！」
嗰次Headhunt都冇勉強我嘅，但佢基本上每隔兩三個月就打嚟，最長嗰次都係隔4至5個月，重複又重複咁問我有冇興趣再去見嗰份工，留意返，個headhunt來來去去都係講緊同一份工，佢唔係介紹新工畀我，仲話嗰間公司連HR同Line Manager都轉咗幾手，已經同當年疫情嘅人唔同晒，如果我再去interview，根本冇人知我曾經因為交通意外而被取消second in……幾好笑！
我唔係要報復，只係而家呢份工作非常穩陣，直頭升埋職喇，反觀當日headhunt介紹嗰間公司，疫情過咗幾年都仲搵緊同一個position，請到人又個個做唔長，連HR同Line Manager都轉晒，所以諗返轉頭真係要多謝嗰單交通意外（唔係黑心），我覺得自己絕對係因禍得福。