網絡上睇到有女求職者著短裙見工被偷影，仲話個老細要求女同事必須要著短裙返工，唔知消息來源係咪真，亦可能有人會覺得好誇張，不過我大約兩年前喺火炭interview都遇過。
嗰次唔係畀人偷影（可能有我都唔知），但對方的確講過一句：「我哋希望女同事著短裙返工，長裙都唔好，褲都唔好。」
講呢句嘅人係男士，因為佢哋唔係咩大公司，所以我連公司名都唔記得喇，佢間office又細，喺火炭工廠區，根本連HR都冇，見我嗰個人就係老細，我聽到之後已經覺得唔妥，見份文職又唔使對客，呢度莫講話唔係商業區，location仲要係舊式工廈，點解一定要著裙呢？仲要強調長裙都唔得。
佢講呢句嗰陣已經係interview尾聲，下一句就問我：「你仲有冇咩問題？」
可能我先入為主覺得對方不懷好意，所以亦唔客氣地講咗句：「我冇嘢要問，亦唔會考慮呢份工，走先。」個男人呆咗一呆，好在冇阻撓我離開。
印象中佢公司有5個人（唔計見我嗰個男人），另外有3男2女咁上下，嗰兩個女仔當時的確係著短裙，因為我走嘅時候刻意望咗一眼。
後來同朋友傾返，考慮過可唔可以採取啲咩行動，但係大家都話間公司冇對我做過啲乜，就咁要求著短裙似乎未致於性騷擾，加上有事要對質起上嚟，對方硬係要講office成日有客walk in，希望員工著裙，長短定義又人人唔同，到時都係冇佢辦法。
今次投稿係因為又有差唔多嘅個案出現，希望女仔去interview嗰陣小心啲，當然大公司一樣有色狼，不過大公司始終多人，環境上比較安心，而去不知名嘅細公司就真係要保護自己，衣著端莊得體就夠喇，唔需要太性感，搵工始終係講求能力。
祝大家搵工順利，唔好遇到禽獸。
投稿讀者：Vivi
編按：關於網絡流傳嘅女求職者見工被偷拍，以下為連登討論區截圖及員工爆料。
=====
⛔ 2019年都有讀者講過，去interview被對方要求即場換黑絲襪
https://hkofficedaily.com/恐怖男headhunt/