有冇試過自己乜都冇做，但係會有人睇你唔順眼？入嚟呢間公司做嘅時候，同部門有個女同事對我面口好差，自問冇得罪佢，而且我份人應該唔難相處，因為除咗呢個三十幾歲嘅女人之外，我同其他同事都相處融洽，甚至有人話過我係「順得人」，咩都say yes，一來自己性格係咁，二來當時我係全公司年資最輕，人哋叫我做嘢點敢推三推四吖！
事情要倒帶返去兩年半前左右，呢個女同事叫安安，有人叫佢安姐（佢唔係高層或者Senior，只係做得耐），做做下嘢佢忽然發晒茅咁周圍搵嘢，然後話自己唔見咗$2,000蚊，仲喺毫無原因之下將茅頭指向我！
「拎返出嚟Raymond！」
聽到安安咁樣講，我都打咗個突，所以本能講咗句：「咩拎返出嚟？」
「我嗰$2,000蚊呀！頭先擺喺枱面，明明見到你行過埋嚟搵阿Ling，拎返出嚟啦！」
阿Ling係佢隔籬位同事，我當時的確有行過埋去搵阿Ling講工作嘅嘢，但係絕對冇拎到佢口中嘅$2,000蚊。
我：「我冇拎過你啲錢喎！」
「我見你頭先望咗一眼，而家隔咗陣就搵唔返，拎返出嚟啦！」
我當時又嬲又尷尬，因為office好多人都望晒過嚟，我絕對冇諗過自己要為一件冇做過嘅事去解釋，而且個罪名仲係偷嘢。
我：「我冇攞！」
「你而家拎返出嚟我當冇事發生過！」
我：「我冇攞呀！」
完全冇印象我有望過佢啲錢，總之我就冇拎，但任憑我重複幾多次都好，安安都係一口硬定係我攞咗，office咁大，起碼有幾十人，點解佢淨係當我係賊呢？
「你再唔攞返出嚟我就搞大件事，你都唔想我報警吖！」
唔知你哋有冇試過畀人屈，我都係人生第一次，當時唔識得控制自己情緒，內心感覺受到侮辱，好多說話同行為已經不由自主地過激，我自將自己個背囊反轉倒晒啲嘢出嚟，雜物散紙遍滿office地下，然之後再逐個櫃桶打開兼拉晒出嚟，逐格舉高反轉，搞到全地下都係文件。
呢個時候已經有同事叫我冷靜啲唔好咁樣，原來一個人好衝動嘅時候，有人叫你冷靜啲，你係會更加唔冷靜，就連一直當我係賊嘅安安都呆咗。
我將自己個位啲嘢翻箱倒櫃之後，再走埋去安安個位，將佢個手袋都反轉，全地係啲唇膏化妝品之類，有同事繼續叫我唔好，但我聽唔入耳，再跟住係將安安成個文件tray翻轉掉落地，我知搞到好嘈，因為已經開始有啲經理級嘅人嚟問咩事同埋試圖制止。
你估下最後嗰$2,000蚊喺邊？就係喺安安自己個keyboard底，我唔知佢係自己責住咗定係點，好在揭發嘅時候好多同事都目睹過程。
我：「呢啲錢咩嚟㗎？係咪我攞你呀？」其實當時我仲講咗好多粗口，因為太激動喇，平時我喺公司基本上係唔講粗口。
安安見返自己嘅$2,000蚊之後態度180度轉變，詳細講咩我已經唔記得，我當時嘅狀態係嬲到手都震晒，震得好犀利，淨係隱約記得佢話係一場誤會。
我情緒失控到一發不可收拾，成個keyboard飛埋佢個電腦mon度，再掃跌晒佢枱面所有嘅嘢，一路撕爛佢幾份文件一路爆粗。
記憶中好多人講嘢，包括我個Manager，但係佢哋來來去去都係嗰幾句，咩冷靜、咩有事慢慢講、咩唔好咁激動……明顯感覺到佢哋驚我用死物發洩完之後會打人，所以一個二個齋講，冇人敢行埋嚟，直至我自己大破壞完之後行咗出去廁所洗面。
有一兩個比較friend嘅同事有追出去廁所，佢哋係畀我嚇親，簡單搭下我膊頭問：「Ok呀？」
經歷完呢一次之後，我喺所有同事心目中嘅形象都變晒，冇人再提起呢件事，同時係少咗好多同事叫我做嘢，或者佢哋覺得我精神有問題啩！因為通常一個發開脾氣嘅人做以上行為，大家有心理準備係唔會覺得有問題，但一個平時做開Yes Man同順得人嘅同事變到咁極端，個感覺係恐怖好多。
呢位安安隔咗一日有同我講sorry，但我眼尾都冇望佢。
後來安安又借頭借路請同事食下午茶，叫我一齊嗌，我都係冇理佢，其實之前未見過安安請人食嘢，都幾明顯佢係想搵個位道歉。
雖然我係一個男仔，但我冇咁大方，又雖然當時大家都知我係冇偷過錢，不過我仍然好介意當刻安安搞到我咁瘀，我諗每個人出嚟社會做嘢都想幫自己樹立個形象，如果唔係搞成咁，我都唔希望其他同事見到我失控嘅一面。
及後嘅日子，我同安安係完全冇講嘢，我哋就係喺呢種氣氛底下再共事兩年半，好在我同其他人相處冇問題，亦慶幸呢間唔係細公司，如果得小貓三四隻反而會尷尬啲。
早排安安辭職，聽講係搵到新工，上星期餐farewell飯佢哋叫埋我去，我唔去，早兩日佢last day買咗散水餅，有行過叫我入pantry一齊食，我直頭冇應佢，我哋就係呢種情況之下結束咗同事關係。
我到而家都唔明點解初入嚟公司嘅時候，呢個安安好似對我有好大惡意，更加唔明點解唔見錢會話關我事，或者係我平時帶飯多，佢覺得我窮啩！
雖然嬲佢嘅心情已經過咗，不過聽到佢唔做嘅消息之後，我承認自己係好開心。小器？我認！