踏入9月，我呢份工就咁啱啱好做足6年，6年前我係15000蚊入職，6年後嘅今日我都係15000蚊人工
份工係當年一個朋友介紹，間公司做網購，得我同老細兩個人，主要賣衫褲鞋襪同小飾物，即係大家平時喺IG見到嗰啲online shop咁，office喺紅磡區一個分租單位，個老細因為要搵貨、design、出post、做客戶服務、寄貨……自己一個搞唔掂，所以請咗我。
公司每個月收入好穩定，係「穩定地冇增長」嗰種穩定，平均每個月淨利潤介乎30000至40000左右（間唔中會有5萬），由於我負責管數同pack貨，所以好清楚。喺老細嘅立場係－－－做又冇得發達，唔做又有啲可惜；一個人做好辛苦，兩個人做賺唔多，三個人做養唔起。
頭一兩年屋企人好支持我做呢份工，但近年佢哋就頻頻叫我辭職，話老細咁多年唔加人工好刻薄
我自己有另一種睇法，可能係份糧唔多，老細對我嘅要求都好低，唔使等黑雨㗎，平時落雨我話唔返就唔返，有時瞓晏咗，同佢講一聲work from home又得，另外，太熱唔想出門口，我都可以唔返公司。喺我唔返工嘅日子，老細會自己包貨，從來冇詐型，佢話我最緊要幫佢搞好啲數同埋stock list，佢最憎對文件嘢。
我計過自己平均一個月返公司10至12次左右，好少朝9晚6，通常返10點幾，然後5點前就走，因為想避開返工放工嘅人潮。
呢啲IG網店間唔中會幾日都開唔到單，冇嘢做嘅時候老細甚至會同我喺office一齊睇Netflix，又試過叫friend上嚟一齊玩board game，可以全日都冇做嘢。差啲唔記得講，個老細係女仔，今年先30歲，仲細過我一年。
冇錯，佢係6年冇加人工，但就畀咗我好大自由度，試諗下，落雨可以唔返，瞓晏咗可以唔返，太熱都可以唔返，我付出嘅都未必值15000蚊，唔係每個人都咁有鬥心同事業心㗎！我承認自己好享受而家呢種工作模式，所以唔覺得老細刻薄，呢份糧可以咁樣返工法，我出去搵唔返㗎喇！