落狗屎都係黃雨 炒晒天文台班友就啱

「各位同事,出面好大雨,就算今日唔會8號風球,相信晏啲都轉黑雨㗎喇,未出門口嘅唔好返office,出咗門口就自行決定啦,我自己都唔返公司。」

老細6點幾喺WhatsApp group留咗呢個msg,我都係7點幾起身先見到,有唔少同事已經回覆咗「知道」、「老細英明」、「Ok!」等等嘅訊息,咁早相信未有人出門,所以大家都好開心。

然後陸續見到好多新聞講呢度水浸,嗰度冧棚架,仲有單咩電流波動,出現幾廿單困lift事故,當時我未完全瞓醒,已經覺得外面立立亂,反正唔使返,咁就攤下啦,點知樓下啲車不斷響按,住低層真係好應聲,後來先知連交通燈都有影響,咁嘅天氣狀況都只係黃雨?

我阿哥慘啲,行出廳嘅時候佢準備出門口返工,一路著鞋一路鬧:「仆街天文台,肯定係啲商家佬唔畀佢哋轉黑雨,半夜已經落狗屎啦!係咪盲㗎!」

突然覺得自己有個好老細好幸福,打開WhatsApp group想讚下佢,成班同事喺度鬧緊天文台。

「佢哋係咪喺密閉office工作,冇窗睇唔到出面環境㗎?」

「我知點解,一定係天文台班友自己要返工,所以唔抵得其他打工仔唔使返。」

「所以咪玩下市民先囉,見到啲人返晒工可能心涼啲,睇住你哋塞車同埋成身濕晒就最開心。」

「心理變態㗎佢哋!最賤係你哋返晒office先轉黑雨,再同你講句:員工應留喺安全地方。咁到時你都返咗工又走唔到,咪繼續留喺安全嘅office做嘢囉!」

呢個時候老細忽然好正經咁留言:「嗱,你哋唔得咁講㗎,天文台一定會撻啲數據出嚟,話你知呢個雨量未係黑雨,要跟規矩,仲會話部分地區大雨啫,唔係區區都大雨吖嘛,晏啲新聞報道嘅時候就有好多解釋㗎喇,總之市民唔應該質疑佢哋專業判斷。」

老細又補充:「不過咁,我都覺得炒晒天文台班友就啱㗎喇!」

其實天文台唔係第一次㗎喇,佢哋可能係跟足指引,但就完全冇前瞻性,亦冇視乎最貼地最實際嘅情況,唔止上班族好狼狽,就連學生同埋家長都唔好受,聽講天文台班友仲好高人工。

後來真係轉黑雨,睇住新聞都覺得恐怖,學生哥濕晒,打工仔濕晒,啲水倒灌噴到半空又有,低窪地區水浸搞到啲車行唔到又有,仲有個女工受傷,唉!

投稿讀者:我真係叫阿Rain

error: