上集全文 👉 舊老細做咗自己下屬 – 上集
上文提要：Rai嘅舊老細盧生（下稱Samson）因為公司結業，四出拜託朋友找尋工作機會，由於Rai目前公司有同事放產假，的確係需要一位臨時嘅跟單，月薪$22000，Temporary Contract，所以Rai就因利乘便叫Samson入嚟做，但佢內心嘅感覺好衝擊，畢竟Samson係佢舊老細，而家調轉做自己下屬。
－－－－－
唔少同事都喺背後討論Samson，由於唔係個個都知我哋之間嘅關係，所以有同事更加直接問我：「點解會請個伯伯嘅？好奇怪咁。係咪公司參加嗰啲長者就業計劃？」
我冇透露Samson係我舊老細，因為冇需要，更加唔想引起其他gossip ，既然冇能力管得住其他人把口，沉默是金同埋保持低調，就係最好嘅應對方法。
每個office都有小圈子，我間公司當然唔例外，特別係Samson同大家有個Generation gap，要融入絕對唔容易，所以頭一個星期我都特登同Samson一齊食lunch，因為唔想佢覺得自己好孤單。
我：「點呀？返咗幾日慣唔慣？」
Samson：「慣，呢度對我嚟講係天堂嚟㗎喇，如果唔係賣咗架車，我應該會做Uber或者FoodPanda，上次約你出嚟之前一日，侍應我都有去見，人哋唔請之嘛」
我：「真定假呀？」
Samson：「真㗎，喺街見到有間茶記貼咗張紙請人，寫住招請侍應，括住時薪，咁我行入去收銀問個女人啦，佢問我幾歲，我話59，佢話咁即係60啦！然後問我有冇做過，我話冇，佢話冇經驗唔請，我話出面張紙寫住無須經驗喎，仲強調自己好快可以上手，嗰個收銀可能係老闆娘啩，好唔耐煩咁話寫係咁寫啫，咁老又冇經驗點請呀？然後佢叫我走，唔好阻住其他客埋單。」
我：「使唔使咁呀！」
Samson：「哈哈，唔怕老實講，嗰一刻我都覺得自己好似隻狗，不過算啦，人哋唔係老奉要畀機會我嘅，所以你當日答應畀呢份臨時工我做，我其實好開心㗎！多謝你！」
以前打Samson份工其實好開心，公司細細，同事間氣氛好好，但亦由於發展空間有限，我先至想趁後生跳出去尋求更大突破，當年佢畀我嘅月薪都唔止22000，而家我只係offer到一份臨時工畀佢，Samson前前後後已經數唔到講咗幾多聲多謝。
Samson好快征服晒所有同事嘅質疑，因為佢太識得人情世故，唔應該做嘅嘢唔會做多，應該做嘅嘢亦絕對唔會做少；好多嘢問完一次就自己研究同解決，從來唔會要其他人幫忙執手尾；同事傾計講笑，佢唔會懶風趣或者扮專家插嘴，所以只會有人撩Samson講嘢，唔會見到佢走去搭訕，佢唔會畀自己陷於任何尷尬局面。
有個客趁住放產假嗰位同事唔喺度，呃Samson話啲單係90日數期，Samson睇返record覺得奇怪所以問我。
我：「呢個客乞衣嚟㗎！之前就係唔準時找數，所以我哋一定要見錢先放貨，嘈過好多次㗎喇，次次大肚同事都嬲到將個電話駁畀我，同佢一齊鬧囉！你唔好理佢，如果打嚟就pass畀我吖！」
結果個客真係打嚟，不過Samson冇駁畀我，數期唔畀，但係order照confirm。
我：「你點搞掂個乞衣客？佢冇煩你咩？無賴嚟㗎喎！」
Samson：「有邊個客唔無賴吖，我冇特別做咩呀，都係同佢講自己只係臨時工，好難做，如果我放咗數期，老細請我返嚟即係完全冇作用，同埋次次大家嘈完個結果都一樣，不如和氣生財啦，但個客都係繼續想賴皮，佢賴皮我咪軟皮蛇咁對待囉，講講下佢都無癮，所以我冇特別做過咩。」
放產假嗰位同事已經好幫得手，不過Samson係更高嘅層次。佢話自己嘅職責應該做醜人，唔好下下煩到個上司，公司請佢返嚟就係要掃走啲沙沙石石，有啲場合如果要勞氣，或者好尷尬要講錢，唔好畀老細或上司自降身價出去同人嘈，做生意始終需要一個位轉身，佢擋咗落嚟，作為上司嘅我將來就可以走棧。
Samson：「有咩事就話係個下屬太硬朗，不過硬朗都係盡責，扮到好明白同helpful，但係一講到數期，同事都會block。你唔使咁勞氣㗎！乞衣客一街都係，佢賴皮你可以更賴皮，佢都未分得清莊閒。」
係，以前個同事無論係大肚之前定大肚之後都一樣火爆，爆完會同我呻，甚至直接pass個客畀我一齊鬧，雖然係人之常情，但自己嘅情緒都會受影響，而家Samson用老細嘅思維去做呢份工，我都發覺需要勞氣嘅地方少咗，心情的確係好咗。
抱歉，呢個故事冇咩高低起伏，Samson亦都冇戲劇性獲得長約，我曾經同HR傾過留用佢，不過得到嘅回覆係：「邊有位畀佢坐啫？Ellen（放產假同事）返嚟之後，啲位都係啱啱好，定你想cut一個換Samson轉長吖？」
我：「唔得唔得，咁樣佢都做得唔開心唔舒服，我盡人事問下啫，因為佢好做得嘢。」
終於嚟到Samson嘅last day，因為疫情關係，成班同事想出去飲茶歡送佢都唔得，反而係Samson買咗啲好精緻嘅散水餅返嚟請大家食，呢種感覺同我當日離開佢公司一樣，唔捨得，但別無選擇，只能講句天下無不散之筵席，而我同Samson之間仲要經歷兩次。
我：「有咩打算？我都會幫你留意下。」
Samson：「唞一唞先囉，個心定咗㗎喇，我又未致於冇錢開飯嘅，唔使擔心，之前掛住忙都冇好好陪屋企人，有咩過埋年先算。」
我：「如果呢度有長工空缺，我第一時間通知你。」
Samson：「多謝你，見到你而家工作好好，個人又淡定咗，我都替你開心，畀心機做呀！」
Last day當日離開公司，陪Samson走過短短嘅一段路再互相道別，感恩呢位舊老細教識我好多嘢，特別係細節方面，祝佢盡快搵到另一個起點。
投稿讀者：Rai