有兩個求職者因為旗鼓相當，我同個Line Manager研究緊請邊個好嘅時候，老闆忽然行咗嚟人事部搵人claim錢，佢見到我哋睇緊CV決定請人，又好輕佻咁加把嘴畀意見：「睇過，呢個position係咪你之前講嘅Assistant Manager呀？」
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。（其他人士或專頁如在Facebook按「share」原文，則不在此限。）
個Line Manager聽完之後就答係，亦好識做咁畀咗兩份CV老闆睇，點知老闆用咗兩三秒就做咗決定。
老闆：「梗係呢個啦，唔係仲要諗呀？」
呢兩三秒佢都未嚟得切睇埋CV下半部分嘅學歷同工作經驗，加上兩份履歷都冇相，仲要兩個都係男性求職者，我唔明佢喺冇份in人嘅情況下點樣作出呢次判斷。
我：「點解係呢個呀？」
老闆：「有冇搞錯呀你，HR連呢啲都唔識？你睇下個地址先，答返我有咩問題，我就即管考下你。」
我同個Line Manager都一頭霧水，再一次睇下兩份CV個地址，畀老闆「欽點」嗰個係住元朗Yoho，而「落選」嗰位就住長沙灣幸福邨，即係佢想要個住得距離公司遠啲嘅人？冇理由吖，唔通係……睇唔起公屋仔？
Line Manager仲心急過我：「我都唔知點解喎，老闆，你睇到啲咩？」
老闆：「所以話你兩個真係，輸經驗即係輸經驗，住公屋啲人好惡㗎！」
我：「你係指邨童呀，黑社會嗰啲？」
老闆：「仲唔明呀？住公屋唔使供樓，個個月交嗰千幾蚊租，畀你倍半租金、雙倍租金好未呀？都係幾千蚊，佢冇壓力冇包袱咪惡囉！唔啱做拍下屁股又話辭職，你自己做HR，你想唔想啲人成日辭職吖？」
我：「唔想……」請問我仲可以點答，都要答佢唔想㗎啦！
老闆：「咪係囉！道理就係咁簡單，你搵個住私樓嘅，喂，佢壓力大過我呀！供樓唔使錢呀？冇錢供樓咪畀人收樓，變銀主盤，你請人就係要搵呢啲有包袱嘅，呢種呢，你出得起人工，真係烹佢都唔肯走呀！」
Line Manager同我對望咗0.5秒，又唔敢太耐，費事畀老闆覺得我哋唔認同。
老闆：「嗱，我再教你哋用一個好簡單嘅方法去分吖！Linda！Annie！你哋都過埋嚟！袋錢落你哋袋！」
Linda同Annie係我HR department嘅另外兩位女同事，老闆霸氣呼喚，點都要畀下面行埋嚟聽啦！
老闆繼續發表偉論：「好易分㗎咋，Estate，見唔見到呀，Estate，或者佢打住Est，呢啲就係邨，即係公共屋邨啦！Court嗰啲呢，好多時都係居屋，住居屋啲友仔壓力就細啲，始終平吖嘛！不過都有包袱，唔會咁易辭職，淨低嗰啲你見到係私樓呢，interview嘅時候就可以秤高啲，供樓好大負擔，真係烹都烹唔走㗎！」
Linda仲要好認真咁追問：「咁如果個求職者冇寫地址呢？」
老闆：「冇寫你咪唔好揀囉！唔好叫佢上嚟見工囉！而家咩時勢呀？你出一個post可以收到幾多份CV吖，你答我。」
Linda：「睇下咩position啦，junior嗰啲都超過50份嘅，middle level同senior有時真係得十幾份。」
老闆：「咪係囉！少極都十幾份，有時仲50幾份，呢個係supply and demand嘅遊戲，你要分清楚莊閒。」
鳩噏完畢……呀唔係，應該係演講完畢，老闆就叫Annie幫佢claim張單，臨走時好認真咁同個Line Manager講：「嗱，記得呀，請住喺Yoho嗰個，風水佬呃你十年八年，我唔會點你。」
講到咁，Line Manager唔揀住Yoho嗰個都唔得啦！
我：「你係咪住私樓？」
Line Manager：「係呀，你呢？」
我：「係呀……」然後我哋相視而笑，唔通我哋就係老闆口中烹都烹唔走嘅員工？
結果住Yoho嗰位同事順利獲聘，我唔介紹佢叫咩名喇，一來費事咁多名記到亂，二來……你睇埋就明。
Yoho返工第三日就有幸同老闆一齊開會，聽返Line Manager講，呀Yoho雖然係Assistant Manager，但點計都係新人，佢竟然以一個新丁姿態公然頂撞老闆。
Line Manager：「我諗你都係執返幸福邨嗰個人嘅CV出嚟先，頭先老闆叫Yoho做嘢，佢一句就ban埋去話唔work，唔會浪費時間做，嗱，如果我冇估錯呢，老闆應該唔畀Yoho過試用期。」
喂呀！試用期成3個月咁長，執返幸福邨求職者份CV都冇用啦，人哋會唔會等你咁耐呀？
之後連續幾日，Line Manager都走嚟同我呻，因為老闆已經先入為主，咩都睇Yoho唔順眼，又話佢喺走廊迎面行過唔打招呼，又話佢喺個位食早餐食到9:30先開工，又話成日去廁所都撞到Yoho，認為佢工作態度好hea。
Line Manager：「你真係打去搵搵幸福邨嗰個，睇佢有工返未，我估Yoho捱唔到3個月。」
一語成籤，不過劇本又有啲唔同，因為Yoho真係捱唔到，但並非老闆炒，而係Yoho自己辭職，先唔計誰對誰錯都好，Yoho返工之後我係感受到佢有啲少爺仔脾氣，咩經濟壓力呀、包袱呀、烹都唔願走呀……我通通感受唔到。
交還staff card嘅時候我多口同Yoho傾咗兩句。
我：「做咩咁快決定唔做呀？唔畀多少少時間自己？」
Yoho：「唔啦，既然唔啱就唔想嘥時間，我哋條team做咩都要同老闆交代，一層又一層，太複雜，最慘係個老闆諗啲嘢都唔work，下下就叫你做咗先喎！」
我：「唉，不過你咁諗喎，可能好多公司都係咁，你冇聽過咩，轉工都係由一個火坑跳去另一個火坑。」
Yoho：「火坑咪唔跳囉，或者好似而家咁，唔對路咪走囉，我又唔係等錢開飯。」
我：「嘩，你就好啦，我每個月要供樓又要畀家用，我都想好似你咁瀟灑呀！」
Yoho：「又唔係瀟灑，難聽啲講，我都係靠阿爸阿媽，而家住嗰度佢哋Full Pay買嘅，我架車都係，不過好少揸，講真我自己玩股票都搵得多過呢度，咁你不如唔好阻我玩股票喇，我搵工都係想有個收入證明，另外自己申請張信用卡啫，而家用老豆張附屬卡好乸煩㗎！用咗咩錢佢一定知，問長問短。」
呵呵！原來Yoho係有錢仔！咁我都唔再多講，無謂阻佢返屋企炒股喇！
幸福邨嗰個求職者已經搵咗新工，唔考慮我哋公司喇，所以早兩日我又要見幾個candidate，Line Manager又走過嚟同我傾啲CV，老闆又再一次行嚟人事部，雖然佢今次係搞其他嘢唔係claim錢，不過成個畫面就好似時光倒流返到當日佢搞Yoho咁。
Line Manager唔知係想擦鞋定玩嘢，竟然拎住啲CV叫老闆畀意見，以為老闆會笠水啦，點知佢仲要死撐：「你哋揀啦，上次教過你哋㗎，Estate嗰啲唔好揀，係個Yoho咁麻煩啫，打破咗個定律，你咪話我話吖，月尾供樓佢就後悔㗎喇！」
咁就容許我搭一搭嘴喇：「原來佢唔使供樓㗎，Yoho住緊個單位係屋企人畀錢買，仲要係Full Pay！」
老闆：「咁樣……死好命囉呢啲！我哋嗰個年代邊有話父母幫個仔買樓㗎，我哋送層樓畀父母享清福就有，咁你哋決定啦吓，唔好再請個咁唔聽話嘅人就得。」
語畢，老闆就一陣風咁走咗，我同個Line Manager忍笑忍得幾辛苦！究竟老闆呢啲離奇價值觀係點得嚟？Estate唔請，因為住公屋特別惡；Court就係居屋，係次選；私樓就一定吞聲忍氣烹都唔走……笑死。