「辭咗職真係冇得去老細個生日會呀？差一個禮拜咋喎！」同事之前last day嗰陣咁樣講，真係唔知好嬲定好笑，我回返佢一句：「咁好簡單啫，你同新公司講遲多一個星期先返工，咁咪可以join birthday party囉！今年有iPhone，又有PS5，除笨有精，你自己諗喇！」
嚴禁轉載聲明：文章版權為《辦公室日報》所擁有，由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的內容放在其他網站圖利。
Last day同事當然冇為咗咁樣而留低，不過佢真心想出席老細個生日會，因為佢上年先至抽中$500現金獎同埋一部GoPro。
我老細嘅生日做到好似結婚擺酒咁，上年喺煌府，今年就喺尖沙咀區某酒店，乳豬全體、龍蝦伊麵、海中寶、鳳尾蝦、大排翅、鮑魚、東星斑，全部有齊晒，因為佢都係揀人哋嘅婚宴菜單，上年喺酒樓就八千幾蚊圍，今年酒店就要過萬，而我哋公司所有同事total要8至9圍，老細係癲到要整埋backdrop，差在未印自己個樣做1：1人型紙板。
除咗有名貴菜式，仲有禮物抽，今年有最新iPhone同PS5之外，仲有Sony最新嗰隻藍芽耳機、Marshall喇叭、Philips鬚刨、Insta360等等，值得一提嘅係，禮物方面人人有份永不落空，如果抽唔到上述嘅嘢，都會有超市現金劵，由100至1000不等，另外再有現金獎，呢樣就唔係人人有份，要抽中你再行出去玩遊戲，贏咗先有，所以好運起上嚟係可以又贏禮物又贏現金。
以前老細仲會送來回機票，一般都係亞洲區，日本、泰國、台灣、韓國都送過，但係呢兩三年就冇咗機票呢份禮物，可能嫌麻煩啩！
同其他公司一樣，我哋都有春茗飯嗰啲，不過論排場論支出，老細嘅生日飯就相對比較豪，春茗或者Annual Dinner抽禮物唔係人人有份㗎！Annual Dinner亦唔會整backdrop，所以氣氛係明顯差好遠。
同事都好識做嘅，餐生日飯已經係老細自己出錢，咁我哋就會各自department夾錢送份生日禮物畀老細，其實一個人都係夾一百幾十，我部門今年送咗部飲茶機，有個茶囊擺落去沖嗰隻呢，結果老細喺生日宴之後又將佢擺喺公司pantry，換言之都係同事享用返部沖茶機，老細係完全唔志在，佢最希望係有好多人陪佢過生日。
有一年老細喺生日宴飲大兩杯，佢係咁發表感性演講，話自己細個父母離婚，跟咗阿爸，但阿爸又送咗佢去外國讀書，然後又點樣畀鬼仔排斥呢樣嗰樣，總之就係有幾年生日都要自己過，仲要冇人記得，老細一路講一路眼濕濕，我哋喺台下就繼續食鮑魚，不過點都好，起碼知道點解老細咁重視自己生日，而且仲要年年都大排筵席，講到尾就係怕寂寞，要熱熱鬧鬧咁去慶生。
好多同事每年呢日都唔敢請假，千祈唔好誤會，唔係唔畀請，而係大家都擔心錯過呢餐飯同埋啲禮物，老細好識做，佢餐生日飯一定揀閒日working day，仲特准同事放4點……
老細自己生日就例牌唔返工，直接夜晚去酒樓或者酒店，佢話畀同事放4點係等大家有時間「裝身」，即係換下衫set下頭，你估真係去飲咩，同事亦唔會咁戇居特登返屋企換衫或者搵人化妝，最盡都係女仔換返高跟鞋，男仔就披返件西裝褸，好畀面㗎喇！
而由於老細生日冇王管，你唔返工就真係有啲笨，個氣氛仲濃厚過中秋同新年嗰種提前收工，因為呢啲節日前夕老細都會返office，可想而知佢係重視自己生日多於一切。
今年我就係抽中個Marshall喇叭，抽中Insta360個同事話想同我換，睬佢都傻，我都唔興拍嘢。
有同事試過唔記得老細生日，一早請咗假，咁都好正常嘅，又唔係自己另一半，唔通嘥個腦嘅記憶體去記住咩，結果個同事銷假，嗰日死都要返嚟公司唔想蝕底，啲獎品獎金咁吸引，唔出席又真係蝕嘅，當日喺公司仲預咗唔使點做嘢。
其實老細鍾意點搞都好啦，揀平日、有早收、冇強制同事一定要去（淨係用銀彈令你覺得唔去好蝕底），同事夾錢買禮物畀老細都係自發性，完全冇壓力，所以佢個生日盛宴又的確冇擾民，大家開開心心幾好吖！(完）