一個打工仔被解僱可能有好多原因，例如不服從上司、經常遲到早退、做錯嘢累公司蝕錢，又或者能力不足，呢啲都係比較常見嘅理由，不過我喺上一間公司被炒竟然係因為進修讀書，你話荒唔荒謬？
當時我一星期有兩晚要上堂，返學嗰兩晚會搭正6點走人，然後老細就問我點解咁準時……咁你份工朝9晚6，我又唔係提早走，6點收工都要解釋？
我照直答因為要返學，之後老細嘅面口已經好難睇，後來有一次我又係6點收工趕住上堂，老細直頭捉咗我入會議室，一世都唔會忘記同佢嘅對話：「我貼錢畀你讀書轉工呀？」
我：「咩叫貼錢？」
「我出糧畀你，你就用份糧去讀書，讀埋啲咩degree之後就轉工吖嘛！」
要駁佢大把嘢可以駁，第一，你出糧畀我，我有做嘢，唔係白拎你啲錢，咩叫做貼錢畀我讀書？第二，你份工我簽咗一世合約？有degree又好，冇degree又好，轉唔轉工係個人自由，賣身契嚟㗎？
我：「你講完未吖？我趕住返學。」因為嘈嚟冇意思，你咁都講得出口，我對間公司都心灰意冷啦！
「我就唔支持員工讀書嘅，你自己遞信啦！」
我：「點解我要自己遞信？你炒我就唔該賠一個月！」
「你知唔知你自己走同埋我炒你有咩分別呀？Reference letter都唔同寫法，你自己遞信啦！」
我：「總之我唔會自己辭職，一係你炒我，賠足一個月。」
講完我就離開，嗰陣時一路讀書一路返工已經好辛苦，日日唔夠時間用，仲要遇到呢種老細真係身心俱疲，我而家講就輕鬆，當時其實嬲到成個人震晒。
結果呢個舊老細炒咗我，但佢有賠足一個月，Reference letter就從來都冇畀過我，之後去見工我係出示返contract同糧單，證明自己真係喺嗰間公司做過。記得有次去interview，個HR問我點解對上一份工被解僱，我照直答之後對方唔信，明白嘅，如果你未遇過呢種變態老細，真係好難想像有人會唔鍾意你進修讀書，仲因為咁而炒你。