初入嚟呢間公司已經好奇怪，點解個個對老細嘅態度都咁差，真頭係0尊，人人都可以鬧佢，我曾經以為嗰個唔係真正嘅老細，又或者其他同事全部係皇親國戚。印象最深刻嘅一次係，坐我後面個男同事講住手提電話同老婆鬧交，愈鬧愈激動，佢唔想影響我哋，所以走咗入老細間房傾電話。（當時老細未返）
及後老細返咗office，一開自己房門就畀嗰位男同事大聲喝：「出返去！」
我嚇咗一跳，老細仲對住佢講唔好意思，轉身走嗰陣又畀嗰位男同事喝多次：「閂門呀！畀啲手尾啦！」
跟住老細又say sorry再閂返房門，我究竟睇緊啲咩？間房係老細㗎喎！
每次開會老細永遠係箭靶，無論佢提出乜嘢意見，班同事都會好不屑：「你唔好搞啦！當呢度上市公司呀！」「你係咪低能㗎！用下個腦啦！」「講你就叻，你自己做吖！」老細完全冇地位可言，誇張啲講，你路過對住佢吐啖口水都冇問題。（當然冇咁做啦，但應該吐完唔會嬲…）
我問同事點解可以咁樣對老細，佢哋冇一個確實嘅答案，淨係會話：「佢Kai㗎！」
經過細心觀察，我明白老細有啲微細之處係好乞人憎，舉個例，佢食煙嘅，但唔知點解成日問人R煙，自己淨係帶火機，呢啲係咪叫「佢出豉油人哋出雞」？佢乞人憎嘅地方唔係R煙，而係R嘅方法，老細會咁樣同另一位食煙嘅同事講：「而家老笠你支煙！」
個同事聽到就會好躁：「你要煙就要煙啦！成日老笠老笠，好L風趣呀？正常啲得唔得呀！」
雖然行為真係好小學雞好抵屌，不過始終係老細，我亦係公司裡面年資最短嗰個，所以我仍然保留幾分尊重……直至有一次，老細拎住條USB-C嘅cable線嚟搵我，佢話：「今朝趕住出門，唔記得拎埋個硬碟定硬盤，但啲資料過晒㗎喇，幫我拉返落嚟吖！」
我以為自己聽漏啲咩所以問清楚：「個hard disk呢？」
老細：「咪話漏咗喺屋企囉，但我過晒㗎喇！」
我：「冇hard disk點拉？」
老細：「啲資料唔會喺條傳輸線裡面㗎咩？我過晒喇喎！」
結果我第一次用粗口同老細講嘢：「你on9㗎？」
班同事係啱，老細堅係Kai，聽講佢試過問gif圖print出嚟係咪都會郁？老細唔認自己有咁樣問過，但幾個同事都話有咁嘅事。我而家都加入咗鬧老細嘅行列，每日唔鬧佢一兩句都周身唔自在，同埋我懷疑老細係M底，畀員工鬧都笑笑口，然後又繼續做埋啲Kai嘢，真係唔屌唔鬆化！