公司請人，揀完一輪CV，頭兩日邀請咗6個求職者上嚟見工，其中一個叫Sofia，約佢係因為從履歷中嘅working expreience見到，呢個女仔曾經喺我哋分公司做過，interview表現中規中矩，唔算好突出，直至我哋傾到佢喺舊公司嘅工作……
我：「你之前做過我哋旗下另一間公司㗎喎，當時點解做咗4個月就走嘅？」
Sofia無啦啦笑：「哈哈！哈哈！」
做乜呀？食咗忽得呀？問你嗰陣點解做4個月就唔do呀？
我：「咩事呢？」
Sofia：「因為嗰陣係Daddy迫我入去做，佢話我成日掛住玩冇目標喎！不過做咗4個月就頂唔順，文職唔啱我。」
我：「文職唔啱你？」小姐，你而家咪send CV嚟見緊文職囉，點㗎你？
Sofia：「而家唔同喇，我覺得自己定性咗好多，今次希望憑實力見成份工，唔想再靠關係，Daddy唔知我嚟interview㗎！」
其實去到呢一刻為止，我仲諗緊眼前嘅Sofia係分公司裡面某員工嘅親屬，估唔到冇咁簡單。
我：「你Daddy係邊個？喺嗰邊（分公司）做緊？」
Sofia：「我Daddy係你老細，哈哈！」
雖然我驚呆咗一下，不過你哈乜柒啫！的而且確，佢又姓黃，我老細又姓黃，但呢個始終係大姓，你又成日笑笑笑好似啪咗嘢咁，點知係唔係白撞㗎？你話你老豆係李家超都得啦！草草傾多幾句，即刻拎埋份CV去請示呢個position嘅Department head，話晒我只係HR，請定唔請始終要交返畀個Department head決定。
我行出房搵個Department head講完之後，成件事已經完咗㗎喇，因為Department head講咗句：「唔係啩！」就走去搵老細求證，最終證實真係老細個女。
Department head：「喂，堅㗎喎！老細又真係唔知個女嚟見工，仲話唔想而家出現畀壓力個女，嗌我平常心咁in，公平對待其他求職者，啱就請，唔啱就唔請，佢兩父女咁搞笑嘅！」
啱就請，唔啱就唔請……講經咩！Department head同我入房見個Sofia嘅時候，所有氣氛根本唔同晒，佢全程同太子女講笑，其實Sofia之後仲有個男仔嚟in，我覺得唔錯，不過Department head已經冇意欲見埋一份喇，傻嘅都知請硬太子女。
我同Department head講過Sofia唔係呢班求職者裡面最好嗰個，我見咗6個人，Sofia肯定三甲不入。
我：「個太子女好奇怪喎！Send份CV嚟見文職，然後同我講自己唔適合做文職，精神分裂呀？一陣做幾個月又走咪仲煩！仲有呀，把口話唔想老細知佢嚟見工，不過又響晒朵，咁即係點呀？」
Department head：「老細把口叫我哋公平啫，你唔係咁天真呀？請咗就樂也融融，唔請隨時得罪老細，容乜易炒我呀！咁我寧願太子女做幾個月又走喇，到時係佢個女問題，唔係我問題，話有得揀，你估真係有得揀咩！」
最終請咗Sofia，其他求職者變晒陪跑，妖！一早係請自己個女入嚟做，最初就唔好叫我出ad搵人啦！你兩父女係咪覺得好好玩呀？
Sofia嘅人工仲高過Department head，笑唔笑死？理Q得你哋啦！請邊個係Department head自己決定，我就睇個太子女做得幾耐。