身邊有唔少朋友上周已經投入返office嘅生活，但隨住疫情第二波爆發，我至少有5個friend嘅公司又宣布重新work from home，有人係一個星期，有人係4月再返，有一個仲要不設期限，直至另外通知。
噚晚見到有人喺fb出咗個post，內容係講：「因為屋企有小朋友，公司又咁多人，好怕會傳染，反正又唔係前線銷售或者服務性行業，文件同email可以喺屋企跟，所以我問老細可唔可以再home office？佢就話Office租好貴，加上驚其他人喺屋企吞pop，所以否決咗，仲話返嚟坐下開下會都好。」
唔同角色有唔同立場，作為老闆，租照交，員工又唔使返（或者分AB team冇咗一半人返工），嗰種納空租嘅感覺係好不安，不過而家個疫情唔係你自己小心就得，都唔係你班員工做足措施就夠，只要同事嘅朋友或者屋企人當中有人唔乖，一個人中招就會帶嚟骨牌效應，到時你要隔離，你老婆仔女要隔離，每一個員工都係咁嘅時候，當中牽涉咗幾多個家庭？
剛先見到一單新聞，係某女藝人喺死線之前由日本返港，自稱隔離咗幾日就走去試鏡，冇事猶自可，有事就真係累得人多；另外有一單新聞，接受緊強制隔離嘅人當中，有人剪手帶擅離家居，兩日拉咗5個，同時間通緝緊36個，呢個世界真係好多自私精，你嘅員工唔係咁嘅人都未夠，如果佢哋身邊有呢種人，大家都係攬炒一鑊熟。
我有模擬過自己中招之後嘅牽連：
我－－－>細佬－－－＞細佬朋友－－－＞我阿媽－－－＞我阿媽同事－－－＞我阿媽親戚－－－＞我同事－－－＞我同事嘅另一半－－－＞我同事屋企人同埋佢另一半屋企人－－－＞我同事啲朋友（下刪一百字）
人生在世最麻煩嘅事就係搞到人，我中咗，要同以上呢堆人講，呢堆人又要同返另一堆人講，然後個個就知係我搞出呢場風雨，最恐怖係咩呀？係要上新聞㗎！唔係匿埋自己受咁簡單，點孭得起呀！
如果業務唔係必須要返office，盡量畀員工再一次work from home啦！唔使覺得咁樣係益咗同事，一兩日就話爽啫，日日home office其實幾折磨㗎，唔係個個都enjoy，唔使諗到班員工會偷懶，而家保命要緊，有起事上嚟全公司同埋家屬朋友都要隔離，期間睇過戲要封戲院，出去食餐飯要封埋人哋餐廳，全香港報紙電視台都報道，到時復元嘅速度仲慢，納空租嘅時間仲長。
靠我哋呢個政府去抗疫真係得啖笑，一早叫你封關又唔封，再死撐唔到之後就封啲唔封啲，就算去到今時今日，啲安排同埋措施仍然好似無掩雞籠一樣，又混亂又冇成效。香港人一定要自己識變通同埋執生，員工為兩餐好難開口要求work from home，亦唔係每個人份工都有條件work from home，僱主如果可以因應架構同情況去安排，對士氣同埋對健康都肯定有幫助。