「麻Q煩！以為老細出trip可以輕鬆啲，點知佢噚日晏晝WhatsApp問我忙唔忙？」我唔知呢位同事之前忙唔忙，但睇得出佢從噚日晏晝開始變得好忙，忙到而家第二日都未停過，難怪一有喘息機會就向我呻。
我：「老細咁問，答唔忙就預咗有嘢要你做啦！」
「點答都死啦！不過好奇怪囉！點解佢淨係WhatsApp我，又唔見問下你？」
我：「有呀！老細噚日朝早10點幾已經WhatsApp我啦！又係問忙唔忙？」
「咁點解叫我做唔叫你做呀？」
係咁嘅，老細朝早10點幾WhatsApp我，我夜晚10點幾先至覆返佢，再打咗呢段msg：「Sorry，今日太忙，放工先睇到，而家唔忙喇，搵我有事？」
結果老細已讀不回，真係冇禮貌
相信老細噚日搵完我，見到遲遲未覆，情急之下先再搵嗰位同事
唔係唔幫呀，老細問人忙唔忙？試問忙緊又點覆呢？仲有時間覆你即係唔忙啦！同埋我有表達自己願意幫手㗎，不過隔咗12個鐘之後你唔使我幫咋！