當初就唔應該珍惜…─情侶座

一位結咗婚嘅女同事話我知,佢人生只係拍過兩次拖,第一次個男仔移情別戀,仲問佢借咗幾萬蚊冇還。

我同事話當年好傷心,錢係其次,唔捨得一段咁多年嘅感情,唔捨得放手,更曾經多次卑微地要求復合。

過咗一段日子,佢終於放低傷痛,遇到第二段感情,即係而家個老公,囡囡都3歲喇。

噚日放假喺屋企,竟然收到前男友Whatsapp,對方問佢:「好耐冇見,好掛住你,做緊咩呀?」

佢答:「湊緊女。」

「哦,結咗婚?恭喜晒。」

佢冇再回覆,不過隔咗大約幾分鐘,前男友再send多個Whatsapp嚟:「可唔可以借5000蚊比我呀?」

我同事冇睬佢,順手block埋個number,所以今日有感而發向我講咗句 ~ 有啲人同埋事喺失去後先知道,當初根本就唔應該好好珍惜。

error: