作為一個維修中心職員，有咩客未見過吖！早兩日先有個西客走上嚟大吵大鬧：「你公司啲嘢全部係垃圾，壞咗呀！整啦！」
佢一路講一路好嬲咁擺低部機（抱歉唔講得咩牌子，驚身份曝光）。
我：「先生，你有冇預約？」
「預你阿媽個仔咩！你估我好得閒呀！一係你而家整，一係我報完消委會再報東張，整啦柒頭！畀一個鐘你，我落去食tea返上嚟要見到部機！」
我：「唔係呀先生，我哋要預約先，就算你有預約，一個鐘都……」
佢好快打斷我：「你試下講多次！點整係你嘅問題，我揀喺度唱衰你公司囉！其他客都聽到之嘛，睇下你瘀定我瘀！」
我：「講下道理好喎！」因為佢真係好挑釁，直頭指住我個鼻呼喝，我都畀佢搞到好躁。
「食屎啦二打六！阿妹你畢業未㗎？暑期工呀？有冇個話得事㗎？你呢啲低級職員行埋一邊啦！」
呢個時候Manager行咗過嚟，不斷向呢位西客耍冧。
Manager：「明白嘅先生！」
「明明明，明你老母呀！」下刪N句粗口。
Manager通通受晒之後，不慌不忙咁解釋：「因為整機始終要師傅，不如咁啦，我照開單畀你先，你都留個電話畀我，無謂嘥你時間吖嘛！」
「你知唔知冇咗部機我幾唔方便呀？」
Manager：「梗係知啦！絕對明白你感受，換轉係我都會好嬲，可能嬲過你添呀！」
嗰位先生由激動變冷靜，由瘋狂爆粗變到分享心路經歷，最後乖乖留低部機同埋聯絡電話，然後返屋企等消息。
個西客走咗之後，我即刻同Manager講：「好佩服你，對住啲咁蠻不講理，仲要句句都有粗口嘅西客，竟然可以咁淡定。」
Manager：「唔使咁上心，勞氣解決唔到問題，最緊要係聆聽個客要咩，只要你易地而處，代入佢嘅感受，令個客覺得你明白佢就夠㗎喇！最重要嘅一點係唔好打斷個客，你要畀佢講晒自己想發洩嘅嘢先，客人自然會feel到你重視佢嘅意見。」
嘩！真係好pro！
後來我同Manager一齊行去搵師傅傾部機點整，師傅話：「哦！好小事啫，就係呢個客頭先喺出面嘈呀？得啦！優先整畀你，30分鐘！」
Manager：「唔好，照正常加一個禮拜吖！我叫佢月中先嚟囉！」
我聽到呆咗，師傅就笑笑口對住Manager講：「衰佬吖！收到！咁我擺埋一邊先，你waive畀佢㗎啦係嘛？」
Manager：「Waive？梗係照收啦！」
師傅：「佢冇壞零件喎，咁照收$150蚊檢查費囉！」
Manager：「有冇壞我講㗎啫！我話壞就壞啦！加$500零件費，連埋檢查費$150，開張$650嘅單，仲有冇嘢壞呀？」
後來我問Manager：「你唔係話勞氣解決唔到問題，要重視個客感受咩？」
Manager：「你見到我有勞氣咩？我重視佢感受喎，不過我都重視自己感受，其實可以一蚊都唔收㗎，佢自己申請，冇辦法啦！」
好陰濕呀！Manager之後打畀個客話本來要整一個月，維修費過千，但係完全明白對方感受，所以叫師傅月中要整好，零件費減半……有料，我都要學下佢咁陰濕，吖唔係，係學下佢咁沉穩。