唔知點解有好多人送心靈勵志嗰類書畀我，禮貌收下，其實我係唔睇㗎🙈
唔係唔好睇，而係唔啱我，即係有人鍾意巴塞，亦有人鍾意皇馬，無話好定唔好，純粹人人喜好唔同。
睇字就算幾勵志都好，現實裡面一旦出現衝擊，嗰種震撼程度都係唔一樣，生活已經係最好嘅老師，經歷已經係最好嘅訓練。
回想起當年好多人睇《窮爸爸富爸爸》，今日都唔見得因為咁而賺到好多錢，反而有個朋友之前發奮圖強，原因係見到身邊嘅人都好勤力兼且捱出頭。
我自己都係咁，每次下晝去中環，見到啲闊太唔使做，從容出入名店購物，做下gym拎住本英文書去coffee shop飲嘢，唔知點解，我會有一種好唔忿氣嘅感覺，心諗自己日日做到隻嘢咁都唔可以過呢啲生活，好唔公平，然後就會返去再勤力啲。
有朋友話：「啲闊太梗係得啦，搵錢方式都唔同。」
我都唔係要做闊太，我想發奮成為佢背後金主嗰種人之嘛😂
以上都係講下笑啫，不過有一樣嘢係真，就係好多人細細個就知道點樣可以成功或者賺錢，睇好多雞湯文，勵志又感人嘅故事，但仍然鬱鬱不得志咁過埋下半生，最大嘅原因係齋諗好簡單，忘記咗行動先係最重要。
最近我睇緊呢兩本書，因為想將之前一連串職場性騷擾嘅故事同埋投稿整理好，再寫畀大家睇。我鍾意睇真實故事，多過紙上談兵嘅心靈雞湯。
領悟同埋成長，一直都係從生活裡面體驗返嚟。